ASEAN Maghisgot sa Polusyon sa Aso gikan sa Indonesia sa Dili Pa ang Summit

Hisgotan sa mga foreign minister sa Southeast Asia ang mga paagi aron masulbad ang polusyon sa aso nga mikaylap sa pipila ka bahin sa rehiyon, sa dili pa ang ASEAN summit sa sunod bulan, matod sa foreign minister sa Malaysia niadtong Lunes.

Ang mga sunog sa kalasangan ug kayutaan nga nagpadayon sulod sa pipila ka bulan sa Indonesia maoy hinungdan sa baga nga aso nga mikaylap sa Singapore ug Malaysia sa miaging mga semana. Tungod niini, gisuspenso ang mga klase sa pipila ka estado sa Malaysia niadtong miaging semana human miabot sa dili na maayo sa panglawas nga lebel ang polusyon sa hangin.

Ang mga sunog, nga kasagarang nahitabo sa mga isla sa Sumatra ug Borneo, mao ang pinakagrabe nga nasinati sa Indonesia sulod sa 11 ka tuig.

Matod ni Malaysian Foreign Minister Mohamad Hasan sa mga reporter, bisan adunay mga pamaagi ang Association of Southeast Asian Nations (ASEAN) sa pag-atubang sa mga natural nga katalagman sama sa baha ug pagbuto sa bulkan, wala pa maapil niini ang polusyon sa aso.

"So this is one of the issues that I will personally bring in a meeting with my counterparts, ahead of the 49th summit in Manila next month," matod niya, sumala sa iyang opisina.

Wala dayong mitubag ang Pilipinas, nga kasamtangang chair sa ASEAN, sa hangyo nga kumpirmahon kung apil ba sa mga hisgotanan sa summit ang problema sa polusyon sa aso.

Una nang mitanyag ang Malaysia og tabang sa Indonesia aron mapalong ang mga sunog.

Matod ni Mohamad, base sa iyang pakighisgot sa foreign minister sa Indonesia, naglisod ang mga bombero sa daghang lugar tungod sa kabaga sa aso nga nakapalisod sa pagtan-aw, kalisod sa pag-abot sa mga apektadong lugar, ug kakulang sa angay nga kondisyon alang sa cloud seeding. -Ato ni Bai