WHO Wala Pa Matino ang Hinungdan sa Kamatayon sa Lab Worker sa Russia

Gipahayag sa World Health Organization (WHO) niadtong Sabado nga wala pa kini mahibalo kon unsay hinungdan sa pneumonia nga nakamatay sa usa ka laboratory worker sa anti-plague research center sa Siberia, Russia karong buwana. Gikumpirma usab niini nga walay natala nga kaso sa plague.

Matod sa WHO, gitaho sa ahensiya sa Russia nga nagdumala sa maong pasilidad nga negatibo sa mga gisuring delikadong mikrobyo ang laboratory worker ug ang mga tawo nga iyang nakauban. Wala gihapoy gipakitang sintomas ang mga nakauban niya, ug wala nay laing natumbok nga kaso sa grabeng pneumonia nga nalambigit sa maong insidente.

"Based on the information provided ... (the) WHO has not identified evidence of ongoing transmission associated with this event. A key uncertainty remains the absence of a confirmed diagnosis in the deceased laboratory worker," matod sa WHO sa usa ka pahayag.

Nagkasakit ug namatay ang laboratory worker niadtong Oktubre 2 ubos sa mga sirkumstansiya nga wala gibutyag. Tungod niini, gipailalom sa quarantine sa mga awtoridad ang dul-an sa 200 ka tawo, nga nakapukaw sa kabalaka bahin sa panglawas sa publiko sa social media.

Mas nagbantay karon ang mga opisyal sa panglawas sa tibuok kalibotan sa mga kaso sa pneumonia nga nakamatay ug wala mahibaloi ang hinungdan sukad sa COVID-19 pandemic, nga nagsugod sa sunod-sunod nga mga kaso sa makamatay ug paspas nga mikaylap nga sakit sa pagginhawa sa China. Sa daghang higayon, lisod matino ang hinungdan sa pneumonia sa usa ka pasyente.

Matod sa mga awtoridad sa Russia, nakadawat ang laboratory worker sa angay nga mga bakuna, ug wala silay nakitang mga mikroorganismo sa iyang lawas nga may kalabotan sa iyang trabaho.

Niadtong Huwebes, gipahayag sa Russia nga nahuman na ang pagsusi sa panglawas sa tanang tawo nga nakauban sa namatay nga laboratory worker. Matod sa mga awtoridad, gihatag na nila sa WHO ang kompletong impormasyon subay sa gitakdang mga pamaagi. -Ato ni Bai