WHO Nanawagan og Sayong Pag-atiman sa Bungi, Usa ka Bata Matag Tulo ka Minuto Apektado

Nagpabiling dakong prayoridad ang pagpalapad sa komprehensibong pag-atiman sa bungi ug siwang sa alingagngag tungod kay matag tulo ka minuto, adunay usa ka bata nga matawo nga adunay maong kondisyon sa tibuok kalibotan, sumala sa World Health Organization.

Sa usa ka news release niadtong Martes, miingon si Smile Train Area Director for Southeast Asia John Manuel Flores nga padayon nga nag-atubang og mga babag ang mga pamilya aron makakuha dayon og tukmang pagtambal bisan pa nga matambalan ang bungi ug siwang sa alingagngag.

Gipasiugda niya nga importante ang komprehensibong pag-atiman aron mabuhi ug motubo og tarong ang bata hangtod sa umaabot.

“Clefts affect far more than a child’s outward appearance. It impacts even basic functions like breathing and eating, and even their well-being as they grow into adulthood,” matod niya.

“Comprehensive cleft care includes essential treatments beyond cleft surgery, such as nutritional support, speech therapy, specialized orthodontics and dental work, hearing care, and psychosocial counseling – all important toward ensuring people with clefts not just live but thrive.”

Gibanabana sa mga health organization ug medical institution sa Pilipinas nga mga 4,000 ka bata sa nasod ang matawo nga bungi, adunay siwang sa alingagngag, o adunay pareho niini matag tuig.

Samtang, gibanabana sa mga medical journal nga ang gidaghanon sa maong kondisyon sa nasod anaa sa usa sa matag 500 hangtod usa sa matag 1,000 ka buhing gipanganak.

Gipasabot usab ni Flores nga dili igo ang operasyon lamang ug gipasiugda ang panginahanglan sa dugayng suporta gikan sa mga pamilya, eskwelahan, ug lokal nga komunidad aron maseguro nga hingpit nga maapil ug masuportahan ang mga bata.

Aron sayong matubag ang mga sayop nga pagsabot bahin sa maong kondisyon, nakigtambayayong ang Smile Train Philippines sa REX Education Foundation Inc. (REFI) sa paglunsad og mga programa sa edukasyon nga nagtumong sa pagpalambo sa pagsabot ug pagdawat sa mga bata diha sa mga eskwelahan.

Miingon si REFI vice chairperson Dominic Leandre Buhain nga adunay gahum ang edukasyon sa paghulma sa kahibalo, panglantaw, ug pagtratar sa mga bata ngadto sa uban.

“Through our partnership with Smile Train Philippines, we hope to foster greater understanding of cleft conditions at an early age, helping nurture classrooms and communities where every child feels respected, included, and empowered to thrive,” matod niya.

Naghatag ang Smile Train og pondo, pagbansay, ug mga kapanguhaan ngadto sa lokal nga healthcare professionals sa tibuok kalibotan aron makahatag og libreng mga pagtambal sa bungi ug siwang sa alingagngag nga makaluwas og kinabuhi ug dakong makatabang sa abilidad sa usa ka bata sa pagkaon, pagsulti, ug paglambo. -Ato ni Bai