USS Abraham Lincoln, mibiya sa Thailand human sa lima ka adlaw nga pagpahulay

Mibiya sa Thailand niadtong Domingo ang US aircraft carrier nga USS Abraham Lincoln human sa lima ka adlaw nga pagduaw ug pagpahulay, nga temporaryong mipahunong sa dugay nang pagdeploy niini nga naglakip sa mga operasyon sa Middle East, sumala sa U.S. Navy.

“We would like to thank the people of Thailand for their incredible hospitality,” matod ni U.S. Navy Captain Dan Keeler, commanding officer sa Abraham Lincoln, sa usa ka pahayag.

Kasagarang molungtad og unom hangtod siyam ka bulan ang pagdeploy sa mga barkong pandigma, apan mahimo kining molugway panahon sa gubat.

Ang Lincoln, nga gipaandar pinaagi sa nuclear power ug adunay dul-an sa 5,000 ka personnel, miapil sa naval blockade sa US ug mga operasyong panggubat sa gubat batok sa Iran. Sumala sa mga Democratic lawmakers, nakatala usab kini og modern-day record sa labing taas nga sunod-sunod nga mga adlaw nga nagpabilin sa dagat.

Kauban ang ubang mga barkong pandigma sa US, miabot ang Lincoln sa Thailand sayo niadtong Miyerkules. Ang Thailand mao lamang ang treaty partner sa United States sa mainland Southeast Asia. Matod sa mga opisyal sa Thailand, lima ka adlaw ang pagduaw sa mga barko.

Nagsugod pag-abot sa usa ka hotel sa resort city sa Pattaya ang mga bus nga puno sa mga marinero ug Marines nga nagsul-ob og sibilyan nga sinina, diin daghan kanila ang nagpahiyom ug nagwarawara, wala madugay human midunggo ang ilang mga barko. Ang Pattaya nahimutang mga 150 kilometro (93 milya) sa habagatan-sidlakan sa Bangkok. -Ato ni Bai