%20(100%20x%20100%20px).png)
Usa ka Barko Nalunod Human Maigo sa Drone Duol sa Baybayon sa Bulgaria
Naigo sa mga drone ang duha ka barko duol sa baybayon sa Bulgaria sa Black Sea ug nalunod ang usa niini, sa ikaduhang susamang insidente sulod sa usa ka semana, matod ni Prime Minister Rumen Radev niadtong Martes.
Ato ni Bai
October 16, 2026 at 7:45:17 AM
Nagdala og mga tripulante gikan sa usa ka barkong nadaot sa drone attack ang usa ka patrol vessel sa Bulgarian border police sa Varna, Bulgaria, human sa rescue operation diin usa ka barko ang nalunod ug usa pa ang nadaot sa Black Sea duol sa Bulgaria, Oktubre 6, 2026.
Petko Momchilov / Reuters
Naigo sa mga drone ang duha ka barko duol sa baybayon sa Bulgaria sa Black Sea ug nalunod ang usa niini, sa ikaduhang susamang insidente sulod sa usa ka semana, matod ni Prime Minister Rumen Radev niadtong Martes.
Matod ni Radev, naigo sa tulo ka drone ang "Chelsea 3", usa ka barko nga gipanag-iya sa mga Ukrainian ug naglayag ubos sa bandera sa Malta, mga 18 nautical miles (33 km) gikan sa baybayon sa Bulgaria, pasado alas 1:30 sa kaadlawon (2230 GMT).
Naguba ang barko apan naluwas ang tanang tripulante niini nga gilangkuban sa pito ka Ukrainian ug walo ka Azerbaijani. Lima sa mga tripulante ang nakadawat og medikal nga pag-atiman, apan walay grabeng nasamdan.
Matod ni Radev, naluwas usab ang usa ka tripulante sa barkong nalunod.
"This is absolutely unacceptable — another attack in the immediate vicinity of Bulgarian territorial waters," matod ni Radev sa iyang pakigpulong sa telebisyon.
"I am due to speak with NATO Secretary General Mark Rutte."
Matod ni Radev, wala pay klarong ebidensya kung kinsa ang nagpahigayon sa pag-atake, apan "the outcome benefits the Russian Federation". Midugang siya nga iyang ipatawag ang Russian ambassador aron hisgutan ang insidente.
Walay direktang utlanan ang Bulgaria sa Ukraine o Russia, apan isip miyembro sa NATO, importante ang posisyon niini sa Black Sea, diin adunay dagkong pantalan ang duha ka nasod. Nagkadako ang kabalaka bahin sa posibleng hybrid attacks gamit ang mga drone sa Russia samtang nagpadayon ang gubat niini batok sa Ukraine.
-Ato ni Bai