US ug Iran Nakig-estorya sa mga Tigpataliwala Aron Tapuson ang Gubat

Nakig-estorya nga tagsa-tagsa ang mga opisyal sa US ug Iran sa mga tigpataliwala niadtong Lunes isip kabahin sa bag-ong paningkamot nga tapuson ang pito ka bulan nga gubat, sumala sa mga opisyal sa duha ka nasod.

Gilauman nga ang sunod nga mga panaghisgot magtutok sa giusab nga bersyon sa pito ka adlaw nga sugyot nga gipresentar sa Iran sa miaging semana atol sa United Nations General Assembly, matod sa usa ka opisyal nga nahibalo sa mga negosasyon ngadto sa Reuters.

Nagsugod ang gubat sa ulahing bahin sa Pebrero sa mga pag-atake sa US ug Israel batok sa Iran, nga mikitil sa kinabuhi sa liboan ka tawo sulod sa pito ka bulan ug nakapakurat sa mga merkado sa tibuok kalibotan samtang nagpabiling nababagan ang importanteng mga agianan sa mga barko nga nagdala og krudo. Kaduha nang nagkauyon ang US ug Iran sa hunong-buto pinaagi sa mga panaghisgot alang sa kalinaw nga gipangulohan sa mga tigpataliwala, niadtong Abril ug Hunyo. Apan dali rang napakyas ang maong mga kasabotan.

Matod sa state news agency nga IRNA, miingon si Iranian Foreign Minister Abbas Araqchi, nga nagpabilin sa New York human mitambong sa General Assembly, nga gipaabot sa Iran ang tubag sa US sa pinakabag-o nitong mga sugyot alang sa hunong-buto ug sa mga kondisyon niini aron mapasig-uli ang agianan sa mga barko sa Strait of Hormuz.

“If the Americans claim they are seeking an agreement or a peaceful solution, we have presented that solution,” matod ni Araqchi.

Nakig-estorya usab nga gilain ang mga opisyal sa US sa mga tigpataliwala niadtong Lunes, matod ni US President Donald Trump sa mga tigbalita sa White House, apan wala siya mohatag og dugang detalye.

Trump Nagpahibalo sa Dugang nga Panaghisgot Karong Semanaha

Ubos sa pito ka adlaw nga plano sa Iran, tapuson ang tanang panag-away sa Iran ug Lebanon, ipagawas ang bilyon-bilyong dolyar nga Iranian assets nga gi-freeze, tapuson ang mga silot batok sa krudo sa Iran, ug tangtangon ang pagbabag sa US sa mga pantalan sa Iran.

Human niini, tugotan sa Iran nga ablihan pag-usab ang Strait of Hormuz, usa ka importanteng agianan sa mga tanker nga nagdala og krudo. Mobalik usab ang duha ka kilid sa panaghisgot bahin sa nuclear program sa Iran ug sa gusto ni Trump nga kuhaon o wagtangon ang highly enriched uranium niini.

Matod ni Trump niadtong Sabado nga iyang gisalikway ang sugyot sa Iran, nga nag-ingon nga gusto sa Iran og dali nga kasabotan tungod sa grabeng pagpamugos sa ekonomiya nga giatubang niini. Apan miingon usab siya sa Axios niadtong Domingo nga gilauman niyang makigbahin ang mga negosyador sa US sa dugang nga panaghisgot karong semanaha.

Matod ni Araqchi niadtong Domingo, wala pa pormal nga gipahibalo sa mga tigpataliwala ang pagsalikway sa US ug naghulat ang Iran sa kataposang baruganan sa Washington sa dili pa modesisyon sa sunod nitong mga lakang.

“Our conditions are clear, and any move toward reopening the Strait of Hormuz is contingent on these conditions being met,” matod niya niadtong Domingo, nga midugang nga ang kasabotan pinaagi sa negosasyon lamang ang makasulbad sa pagkabutang sa duha ka kilid sa walay kasabotan. -Ato ni Bai