US Regulators Susihon ang Testosterone Therapy sa Menopausal nga mga Babaye

Susihon sa mga health regulator sa U.S. karong Huwebes ang siyentipikong ebidensya bahin sa paggamit sa testosterone sa menopausal nga mga babaye, lakip ang mga benepisyo, risgo, hustong dosis ug papel niini sa panglawas sa kababayen-an, ingon man ang mga panglantaw sa mga doktor ug pasyente.

Gipahigayon ang publikong tigom samtang nagkadaghan ang mga babaye nga naggamit og testosterone aron makatabang sa mga sintomas sa menopause. Matod sa U.S. Food and Drug Administration, mahimong makatabang ang tigom sa paggiya sa umaabot nga panukiduki ug paghimo og mga tambal.

Wala pay testosterone therapy alang sa mga babaye nga giaprobahan sa FDA, bisan pa sa daghang tuig nga off-label nga paggamit niini sa pagtambal sa ubos nga tinguha sa pakighilawas, nga gitawag og hypoactive sexual desire disorder, o HSDD.

Sa miaging tuig, gitangtang sa FDA ang boxed warning bahin sa dugang nga risgo sa cardiovascular disease gikan sa mga testosterone product alang sa mga lalaki human susiha ang mga pagtuon human kini gibaligya, bisan nagpabilin ang mga pahimangno bahin sa pagsaka sa presyon sa dugo.

Ang mga doktor nga nagreseta og testosterone sa mga babaye kasagarang mogamit og ubos nga dosis sa mga product nga giaprobahan alang sa mga lalaki, kasagaran pinaagi sa pagbahin sa mga product sama sa AndroGel sa AbbVie ug Testim sa Keenova Therapeutics, o paggamit og compounded formulations.

Nakahatag og praktikal nga mga kalisod sa mga doktor ang kakulang sa product nga espesipiko alang sa mga babaye, matod ni Dr. Diana Tordoff, instructor sa obstetrics and gynecology sa Stanford. Matod niya, ang usa ka aprobahan nga product mahimong makahatag og parehas nga sukdanan sa dosis, label ug giya sa pagmonitor sa kaluwasan, ug posibleng makapaayo sa insurance coverage.

Bisan pa, matod sa pipila ka eksperto, adunay importanteng mga pangutana nga wala pa matubag. Gikinahanglan pa ang dugang nga dugayng datos bahin sa kaluwasan, matod ni Dr. Stephanie Faubion, director sa Mayo Clinic’s Center for Women’s Health.

Giaprobahan o gihatagan og lisensya sa United Kingdom, Australia, New Zealand ug South Africa ang mga testosterone product nga espesipiko alang sa mga babaye.

Nakadawat ang FDA og ginatos ka komento gikan sa publiko sa wala pa ang tigom, diin daghang babaye ang naghulagway sa pag-uswag sa ilang tinguha sa pakighilawas, kusog ug kalidad sa kinabuhi samtang naggamit og testosterone.

EBIDENSYA UG MGA KULANG SA DATOS SA KALUWASAN

Misaka ang interes sa testosterone taliwala sa menopausal nga mga babaye uban sa mga pahayag sa social media nga makatabang kini sa pagpausbaw sa kusog, muscle mass, kahimsog sa bukog ug panghunahuna, bisan matod sa mga espesyalista, pinakalig-on ang ebidensya alang sa HSDD.

“We do not have any evidence in women that it will improve muscle mass or bone density or mood or well-being or really any other metric,” matod ni Faubion.

Matod ni Dr. Karen Adams, director sa Stanford Medicine’s Program in Menopause and Healthy Aging, upat na ka higayon nga gisusi sa FDA ang testosterone alang sa paggamit sa mga babaye apan wala kini maaprobahi tungod sa kakulang sa dugayng datos bahin sa kaluwasan ug mga kabalaka sa risgo sa cardiovascular disease ug breast cancer.

Giaprobahan sa FDA ang mga kapilian nga dili testosterone sama sa Addyi sa Sprout Pharmaceuticals ug Vyleesi sa Cosette Pharmaceuticals alang sa pipila ka pasyente nga adunay HSDD.

Kasagarang dili girekomenda ang testosterone alang sa mga babaye nga adunay kasaysayan sa breast cancer tungod kay mahimo kining mahimong estrogen sulod sa lawas nga mahimong makapadako sa pipila ka matang sa cancer.

Ang sobra nga testosterone mahimong hinungdan sa bugasbugas ug pagdaghan sa balhibo, matod sa mga doktor, samtang ang mas talagsaong mga epekto sama sa paglalom sa tingog ug pagkalagas sa buhok mahimong dili na mabalik.

Gipakita sa mga pagtuon nga ang testosterone therapy kasagarang giisip nga luwas alang sa mga lalaki nga medikal nga nadayagnos nga adunay ubos nga lebel sa hormone kon gireseta ug gibantayan sa doktor.

Gipangulohan nila Tordoff ug Adams ang MIX-T pilot study sa Stanford nga nagsusi kon giunsa pag-apekto sa ubos nga dosis sa testosterone ang kahimsog sa vagina ug vaginal microbiome sa postmenopausal nga mga babaye. Gilauman ang mga resulta sulod sa sunod nga duha ka tuig. -Ato ni Bai