Upat ka giingong ‘narco-terrorists’ patay sa pag-atake sa US military sa Caribbean

Gipatay ang upat ka tawo sa pag-atake sa US military sa usa ka sakayan sa Caribbean Sea niadtong Domingo, ang pinakabag-o sa sunod-sunod nga mga pag-atake nga matod sa Washington gitumong sa mga “narco-terrorists,” apan gikondena sa mga eksperto sa tawhanong katungod isip extrajudicial killings.

Matod sa US Southern Command sa X, kini “executed a lethal, kinetic strike on a go-fast vessel operating along established narco-trafficking routes in the Caribbean.”

Gikutlo niini ang gitawag niini nga “confirmed intelligence” aron ipasangil nga aktibong nalambigit ang sakayan sa pagpayuhot og ilegal nga droga, apan wala kini naghatag og dugang detalye.

Gidugang niini nga upat ka tawo, nga gitawag niini nga “narco-terrorists,” ang namatay.

Matod sa administrasyon ni President Donald Trump, ang mga sakayan nga giatake niini sukad Setyembre 2025 nagdala og ilegal nga droga.

Kapin sa 220 ka tawo ang namatay sa mga pag-atake sa US sa susamang mga sakayan sa Caribbean ug Eastern Pacific.

Gikuwestiyon sa mga eksperto ug tigpasiugda sa tawhanong katungod sa US ug ubang nasod ang legalidad sa maong mga pag-atake.

Gitawag sa Human Rights Watch, Amnesty International ug independent UN experts ang mga pag-atake nga supak sa balaod nga extrajudicial killings.

Matod ni Ben Saul, UN special rapporteur on human rights and counterterrorism, adunay “reasonable grounds to believe” nga ang maong mga pag-atake “constituted crimes against humanity of murder under customary international law.”

Gitawag sa American Civil Liberties Union ang mga pahayag sa Trump administration batok sa mga target niini nga “unsubstantiated, fear-mongering claims.” -Ato ni Bai