Ulan tungod sa habagat, magpadayon sa Luzon ug Western Visayas

Makasinati og ulan ang Luzon ug Western Visayas karong Martes tungod sa nagpadayong southwest monsoon o habagat, matod sa weather bureau.

Miingon ang Philippine Atmospheric, Geophysical and Astronomical Services Administration (PAGASA) nga monsoon rains ang masinati sa Zambales ug Bataan.

Posibleng mahitabo ang kalit nga pagbaha o landslide tungod sa kasarangan hangtod sa kusog nga ulan.

Makasinati usab og panagsang ulan ang Pangasinan, Tarlac, Pampanga, Cavite, Batangas, ug Occidental Mindoro.

Gipaabot ang nagkatag nga ulan ug thunderstorms sa Metro Manila, ubang bahin sa Luzon, ug Western Visayas.

Ang kasarangan hangtod sa kusog nga ulan niining mga lugara mahimong hinungdan sa kalit nga pagbaha o landslide.

Samtang, ang ubang bahin sa nasud makasinati og panagsa nga rain showers tungod sa habagat ug localized thunderstorms.

Gipaabot usab ang hinay hangtod kasarangang hangin ug slight to moderate nga kahimtang sa kadagatan sa tibuok kapupud-an.

Samtang, miingon ang PAGASA nga wala silay gimonitor nga low pressure area nga posibleng mahimong tropical cyclone. -Ato ni Bai