Typhoon Saudel Gilaum Mosulod sa PAR Agosto 24

Gilaum nga mosulod ang Typhoon Saudel sa amihanan-sidlakang utlanan sa Philippine Area of Responsibility (PAR) karong Lunes ug mopakusog sa southwest monsoon o “habagat”, sumala sa weather bureau.

Alas 3 sa kaadlawon, miingon ang Philippine Atmospheric, Geophysical and Astronomical Services Administration (PAGASA) nga nahimutang ang Saudel 1,660 km. sa sidlakan-amihanan-sidlakan sa extreme northern Luzon, nga adunay maximum sustained winds nga 175 km. per hour (kph) duol sa sentro, samtang nagalihok paingon sa kasadpan-amihanan-kasadpan sa 30 kph.

Miingon ang PAGASA nga ang Saudel, nga hatagan sa lokal nga ngalan nga Obet, magpabilin ibabaw sa Philippine Sea ug posibleng mahimong super typhoon sa dili pa mogawas sa PAR sa Martes.

Makasinati ang Batanes og panagsang pag-ulan tungod sa southwest monsoon, ug ang kasarangan hangtod kusog nga ulan mahimong hinungdan sa kalit nga pagbaha o pagdahili.

Makasinati ang Metro Manila, Ilocos Region, Cordillera Administrative Region, Central Luzon, nahibiling bahin sa Cagayan Valley, Cavite, Batangas, ug Rizal og dag-om nga kalangitan uban sa nagkatag nga ulan ug mga dalugdog tungod usab sa habagat.

Ang nahibiling bahin sa nasud makasinati og medyo dag-om hangtod dag-om nga kalangitan uban sa tagsa-tagsa nga pag-ulan tungod sa localized thunderstorms.

Makasinati ang amihanan ug kasadpang bahin sa Luzon og kasarangan hangtod kusog nga hangin gikan sa habagatan-kasadpan ug kasarangan hangtod balod kaayong kadagatan.

Samtang, gibantayan usab sa weather bureau ang usa ka tropical depression nga nahimutang 1,330 km. sa sidlakan sa southern Luzon, apan wala kini gilaum nga mosulod sa PAR.