Tulo Ka Tropical Depression Nagpalig-on sa ‘Habagat’

Makasinati og panagsa hangtod kusog nga pag-ulan ang dagkong bahin sa Luzon ug kasadpang bahin sa Visayas tungod sa tulo ka tropical depression (TD), lakip ang “Pilandok,” nga gamayng mikusog samtang hinay-hinay kining naglihok ibabaw sa Philippine Sea sa sidlakan sa extreme northern Luzon, matod sa weather bureau niadtong Lunes.

Sa advisory niini alas-5 sa buntag, miingon ang Philippine Atmospheric, Geophysical and Astronomical Services Administration (PAGASA) nga halos wala naglihok ang Pilandok ug nahimutang 1,120 kilometros sa sidlakan sa extreme northern Luzon, nga adunay maximum sustained winds nga 55 kph duol sa sentro ug paghuros sa hangin nga moabot sa 70 kph.

Gilaum nga palig-onon sa Pilandok, uban sa laing duha ka tropical depression, ang southwest monsoon o “habagat” samtang nagpabilin kini nga tropical depression sulod sa Philippine Area of Responsibility (PAR).

Gibanabana nga magpabilin ang kusog niini sulod sa sunod nga 24 oras, mahimong makadiyot nga mokusog ngadto sa tropical storm sa Martes, ug mogawas sa PAR sa Miyerkules sa gabii o sayo sa Huwebes sa buntag.

Gibantayan usab sa PAGASA ang low pressure area (LPA) nga nahimong tropical depression Saudel (kanhi Obet) pag-usab gawas sa PAR, 1,180 km sa kasadpan sa extreme northern Luzon.

Adunay maximum sustained winds nga 45 kph duol sa sentro ang Saudel ug paghuros sa hangin nga moabot sa kph samtang naglihok paingon sa habagatan sa 15 kph.

Nahimo usab nga tropical depression ang laing LPA, nga nahimutang 485 kph sa kasadpan-amihanan-kasadpan sa Itbayat, Batanes. Aduna kini maximum sustained winds nga 45 kph ug paghuros sa hangin nga moabot sa 55 kph samtang naglihok paingon sa amihanan-amihanan-sidlakan sa 15 kph.

Makasinati og monsoon rains ang Ilocos Region, Abra, Benguet, Bataan, Zambales, Tarlac, ug Pampanga tungod sa southwest monsoon.

Makasinati og panagsang pag-ulan ang ubang bahin sa Cordillera Administrative Region, Batanes, Babuyan Islands, Nueva Vizcaya, Nueva Ecija, ug Bulacan, tungod usab sa habagat.

Makasinati ang Metro Manila, Calabarzon, ubang bahin sa Cagayan Valley, Aurora, Occidental Mindoro, Oriental Mindoro, Marinduque, Romblon, Aklan, ug Antique og madag-umon nga kalangitan uban sa nagkatag nga pag-ulan ug thunderstorms tungod sa southwest monsoon.

Makasinati ang ubang bahin sa Luzon, Negros Island Region, ug ubang bahin sa Western Visayas og medyo madag-umon hangtod madag-umon nga kalangitan uban sa panagsang rain showers o thunderstorms tungod sa “habagat.”

Makasinati og localized thunderstorms ang Mindanao ug ubang bahin sa Visayas.

Gipasidan-an sa PAGASA ang mga residente sa posibleng kalit nga pagbaha o pagdahili sa yuta tungod sa kusog hangtod grabeng pag-ulan nga dala sa southwest monsoon.

Gitambagan sa weather bureau ang mga marinero sa gagmayng sakayan, lakip ang tanang matang sa motorbanca, nga dili mopalaot sa kasadpang baybayon sa Luzon.

Samtang, miingon ang PAGASA nga usa ka low pressure area (LPA) ang namatikdan 3,105 km sa sidlakan sa Eastern Visayas, nga “no direct effect” pa sa nasod. -Ato ni Bai