Tulay nga Nagdugtong sa China ug North Korea Ablihan sa Oktubre 15

Ablihan sa Oktubre 15 ang dugay nang nalangan nga New Yalu River Bridge nga nagdugtong sa China ug North Korea, sumala sa Chinese state news agency nga Xinhua niadtong Miyerkules.

Maghiusa ang duha ka nasod sa pagpahigayon og seremonya alang sa pag-abli sa tulay, sumala sa report.

Nahuman sa China ang ilang bahin sa tulay niadtong 2014 aron mapalig-on ang patigayon tali sa duha ka nasod.

Apan wala mahuman sa North Korea ang mga dalan paingon sa tulay ug mga pasilidad sa customs tungod sa pagkadaot sa ilang relasyon human sa nuclear tests sa Pyongyang ug sa misunod nga mga silot sa United Nations (UN).

Ang pag-abli sa bag-ong tulay nagpakita sa dugang nga pag-uswag sa relasyon tali sa Beijing ug Pyongyang, pipila ka semana human giablihan sa North Korea ang unang tulay alang sa mga sakyanan nga nagdugtong niini sa Russia.

Misaka sa $2.3 billion ang exports sa China ngadto sa North Korea sa miaging tuig, ang pinakataas sulod sa unom ka tuig ug 25% nga pagtaas kumpara sa miaging tuig. Apan ubos gihapon kini sa lebel sa patigayon sa wala pa ipatuman ang mga silot sa UN niadtong 2017.

-Ato ni Bai