Trump mireklamo sa wala pagkadaog sa Nobel Peace Prize ug gikondena ang desisyon sa Norway

Gisubli ni US President Donald Trump niadtong Biyernes ang iyang reklamo sa wala niya pagkadaog sa Nobel Peace Prize, nga iyang gihulagway nga makauulaw nga desisyon ug nagbilin og mantsa sa reputasyon sa Norway, diin nahimutang ang Nobel committee.

Gisaway ni Trump ang Norway pipila ka oras human gihatag sa komite ang Nobel Peace Prize karong tuiga kang Navi Pillay, usa ka kanhing huwes sa International Criminal Court nga nangulo sa usa ka taho sa United Nations (UN) nga nakahinapos nga nakahimo og genocide ang Israel sa Gaza.

Gitawag ni Trump si Pillay nga usa ka "mystery person" atol sa iyang campaign rally sa Syracuse, New York. "I never heard of the person. Nobody did."

Matag tuig sa iyang pagkapresidente, gipahayag ni Trump ang iyang kasagmuyo tungod sa wala niya pagkadaog sa maong pasidungog.

"This is an indelible stain on the country of Norway and those people that made such a disgraceful and embarrassing decision," matod ni Trump.

Gilista niya ang pipila ka panagbangi nga iyang giangkon nga natabangan niyang masulbad. Miingon usab siya nga nakatabang siya sa pagpugong sa posibleng mga gubat tali sa North Korea ug South Korea, Japan ug North Korea, ug China ug Taiwan, apan wala siya maghatag og ebidensiya sa iyang mga pag-angkon.

"The Nobel Peace Prize has been forever discredited by a handful of radical ideologues who are anti-democracy and really enemies of civilization. And we will not forget, Norway," matod niya.

-Ato ni Bai