Tooro Kingdom sa Uganda Nagkorona sa Kanhing TV News Anchor Isip Bag-ong Hari

Gikoronahan niadtong Martes isip hari sa Tooro Kingdom sa Uganda ang usa ka kanhing TV news anchor, nga nahimong ika-13 nga hari sa mga Batooro sa usa ka seremonyang puno sa tradisyonal nga mga ritwal nga nagtapos sa lalis bahin sa pagpuli sa trono.

Mipuli si Edward Rukidi Kijanangoma kang King Oyo Nyimba Kabamba Iguru Rukidi IV, kinsa namatay tungod sa kanser sa edad nga 34 sa miaging bulan. Ang iyang kamatayon maoy hinungdan sa lalis human miingon ang iyang inahan nga adunay anak nga lalaki ang namatay nga hari nga wala kaniadto ipahibalo sa publiko ug maoy adunay katungod sa trono.

Usa ka constitutional republic ang Uganda nga gidumala sa napiling presidente, apan nagpabilin ang upat ka gingharian nga naglungtad na sa wala pa ang panahon sa kolonisasyon isip impluwensyal nga mga simbolo sa pagkatawo ug kabilin sa ilang katawhan, bisan wala kini gahum sa politika.

Gipili sa 21 ka miyembro nga komite gikan sa harianong Babiito clan si Kijanangoma, 56, nga ig-agaw ni Oyo Nyimba.

Usa ka tinubdan nga adunay kahibalo sa lalis bahin sa pagpuli sa trono misulti sa Reuters nga giduso sa sentral nga gobyerno sa Uganda ang maong desisyon bisan pa sa pagsupak sa inahan sa namatay nga hari.

Gikuha ni Kijanangoma ang bag-ong harianong ngalan nga Edward Rukidi Nyabongo I atol sa tradisyonal nga seremonya nga naglakip sa pag-ihaw og toro ug pagwisik sa dugo sa himungaan sa Fort Portal, ang kapital sa Tooro.

Naglakaw si Nyabongo I paingon sa Karuziika Palace tali sa tungang gabii ug alas 3 sa kadlawon sa wala pa miapil sa usa ka hinimo-himong panagsangka alang sa korona.

Hari sa edad nga 3

Namatay si Oyo Nyimba sa US niadtong Agosto 27 samtang nagpatambal sa angiosarcoma, usa ka agresibong matang sa kanser. Gilubong siya niadtong Setyembre 12 sa Karambi Royal Tombs sa Fort Portal.

Nakuha niya ang pagtagad sa tibuok kalibotan niadtong 1995 sa dihang gibutang siya sa trono sa edad nga 3 human sa kamatayon sa iyang amahan. Nakadani sa daghang tawo ang mga hulagway sa batang hari nga nagsul-ob og harianong bisti ug korona.

Gihulagway si Nyabongo I sa iyang kanhing mga kauban sa state broadcaster nga UBC, diin nagtrabaho siya isip news anchor ug editor, nga mapainubsanon ug yano nga tawo.

“Everyone in Fort Portal is happy because of this new king. We are preparing. Women are ironing their masuka. Men are ironing their kanzus,” matod ni Tooro resident Elizabeth Kengonze sa wala pa ang koronasyon, nga nagtumong sa tradisyonal nga mga sinina.

“People are practicing how they will sing Amakondere (praise music). We are very happy and grateful because Tooro, as a culture, is being promoted and the young ones are now knowing and learning how the Tooro culture was.”

Sa miaging weekend, nagtigom ang mga paryente sa Karuziika Palace, ang bag-o niyang puloy-anan, uban sa tradisyonal nga mga manunugtog og tambol ug mga mananayaw nga nagsul-ob og mga calabash ug orange nga mga habol nga hinimo sa panit sa kahoy.

Gipadayon ang koronasyon bisan pa sa pagsupak sa inahan ni Oyo Nyimba nga si Best Kemigisa ug sa iyang igsoong babaye nga si Princess Ruth Komuntale. Matod nila, adunay gamayng anak nga lalaki ang namatay nga hari ug nagbilin siya og testamento nga nagngalan sa bata isip manununod sa trono.

Wala maminyo si Oyo Nyimba ug wala usab mahibaloi sa publiko nga aduna siyay mga anak. Ang prime minister sa gingharian maoy unang mihisgot bahin sa usa ka bata sa pahayag nga nagpahibalo sa iyang kamatayon.

Matod ni Charles Kayondo Kamurasi, pangulo sa harianong Babiito clan ug tradisyonal nga tigpili sa hari, wala silay nahibaloan nga anak sa namatay nga hari ug gisunod sa clan ang mga tradisyon sa Tooro sa pagpili sa iyang mopuli.

“The child they are claiming to be there is not known,” matod ni Kamurasi sa media sa miaging semana. -Ato ni Bai