Tawo nga Giingong Nag-aghat sa Teenage School Shooter sa South Cotabato Gipangita

Gipangita sa mga awtoridad ang usa ka tawo nga gidudahang nag-impluwensiya pinaagi sa online conversations sa menor de edad nga nalambigit sa makamatay nga school shooting sa Banga, South Cotabato, matod ni Department of the Interior and Local Government (DILG) Secretary Jonvic Remulla.

Sa usa ka pahayag niadtong Miyerkules, matod ni Remulla nga anaa sa Pilipinas ang maong tawo ug nailhan na sa mga awtoridad ang iyang nahimutangan.

Matod sa DILG chief, gipahimuslan sa maong tawo ang mga insecurity sa estudyante ug giawhag kini sa paghimo og kapintasan pinaagi sa pagsaad nga mailhan siya tungod sa maong buhat.

“They prey upon their insecurities, telling them that they will be glorified if they do something like this. It’s a very insidious way of inciting that kind of hate,” matod niya.

Una nang miingon si Remulla nga nakit-an sa mga imbestigador ang kalambigitan sa gibuhat sa junior high school student sa iyang exposure sa deep dark web.

“They now glorify violence through the deep dark web. It’s very alarming,” matod niya.

Human sa mga school shooting sa Tacloban, Zamboanga, ug Cotabato, matod ni Remulla nga seryosong gitagad sa mga awtoridad ang mga online threat nga may kalabotan sa school shootings. Gihisgotan niya ang upat ka estudyante nga una nang nasakpan tungod sa makapabalakong mga post sa Facebook.

Matod niya, nagtinguha ang gobyerno og mas lapad nga tubag batok sa kapintasan sa mga eskwelahan, lakip ang mga lakang aron limitahan ang access sa mga menor de edad sa social media ug mga website, susama sa pamaagi nga gihimo sa Australia.

Giawhag usab ni Remulla ang mga ginikanan nga mogiya sa ilang mga anak ug bantayan ang mga timailhan nga mahimo silang madani sa kapintasan online.

“We’re asking the parents to watch their children kaysa (which is better than) we discover it too late,” matod niya. -Ato ni Bai