Sweden mihunong sa plano nga ipaubos ang edad sa criminal responsibility ngadto sa 13 anyos

Gikumpirma sa gobyerno sa Sweden nga ilang ibasura ang kontrobersyal nga plano nga ipaubos ang edad sa criminal responsibility ngadto sa 13 anyos gikan sa kasamtangang 15 anyos.

Matod ni Justice Minister Gunnar Strömmer, kulang ang suporta sa parlyamento alang sa maong sugyot, busa imbes ipatuman kini, magpasaka hinuon ang gobyerno og bag-ong balaod nga magtakda sa minimum nga edad sa criminal responsibility ngadto sa 14 anyos.

“We are going to propose that the age of criminal responsibility should be cut to 14 instead of 13-years-old (Magpasaka kami og sugyot nga ang edad sa criminal responsibility ipaubos ngadto sa 14 imbis 13 anyos),” matod ni Strömmer.

Sa miaging duha ka dekada, misaka ang kaso sa gang crime sa Sweden, ug ang gidaghanon sa mga pagpamusil nahimong usa sa pinakataas sa Europe.

Tungod niini, gihimo sa gobyerno ang komprehensibong pagreporma sa criminal justice system pinaagi sa paghatag og dugang gahom sa pulisya ug pagpatuman og mas higpit nga mga silot, apan nagpabilin gihapon ang problema sa pagrekrut sa mga gang sa mas bata nga mga bata alang sa mga bayolenteng krimen.

Matod ni Gunnar Strömmer, kapin 50 ka mga bata ubos sa 15 anyos ang nag-atubang og kaso sa korte niadtong miaging tuig tungod sa suspetsang murder o attempted murder.

Sa kasamtangan, ang mga bata nga nakasala og bayolenteng krimen gina-butang sa mga balay-ampanan sa kabatan-onan, apan giila nga napakyas ang maong sistema sa pagresolba sa problema.

Nagplano ang gobyerno nga ang mga bata nga 13 anyos ibutang sa special prison units, apan wala kini madayon.

Sumala sa United Nations Committee on the Rights of the Child, ang minimum nga edad sa criminal responsibility kinahanglan dili ubos sa 14 anyos, nga mao usab ang average nga edad sa mga nasod sa European Union.

-Ato ni Bai