Suspek nga adunay ₱204M nga shabu, nadakpan sa Las Piñas

Gidakop sa Philippine National Police (PNP) ang usa ka high-value drug suspect ug nasakmit ang mga 30 ka kilo sa giingong shabu nga nagkantidad og PHP204 million atol sa buy-bust operation sa Las Piñas City niadtong Sabado.

Nasakpan ang 40-anyos nga suspek nga alyas “Girlie,” nga taga-Lubao, Pampanga, sa BF International Village, matod sa PNP sa usa ka news release niadtong Domingo.

Nakuha gikan kaniya ang kapin-kulang 30 ka kilo sa shabu nga gibanabanang nagkantidad og PHP204 million.

Itugyan ang nasakmit nga droga ug ubang ebidensiya ngadto sa Forensic Group Southern Police District sa Taguig City alang sa laboratory examination ug tukmang pagproseso.

“We will sustain decisive law enforcement efforts against those who profit from the illegal drug trade,” matod sa PNP.

Samtang, giawhag sa National Capital Region Police Office (NCRPO) ang mga courier company ug delivery rider nga magmabinantayon batok sa paggamit sa lehitimong delivery services sa pagdala og ilegal nga droga ug uban pang kontrabando.

Gipahinumdoman ni NCRPO Officer-in-Charge Brig. Gen. Christopher Abrahano ang mga courier company ug delivery rider human mitaho ang duha ka motorcycle delivery rider sa Marikina City bahin sa mga kadudahang parcel nga gipadala kanila aron i-deliver.

Nadiskobrehan sa police nga adunay ilegal nga droga nga nagkantidad og labing menos PHP150,000 sa maong mga parcel.

“We are reminding all courier companies and delivery personnel: Be vigilant. Do not allow your legitimate business to be unknowingly used as a tool by criminal syndicates in transporting illegal drugs or other contraband,” matod ni Abrahano.

-Ato ni Bai