Super’ El Niño Posibleng Makadugang og 451,000 ka Kamatayon sa Tibuok Kalibotan

Posibleng mosangpot sa mokabat og 451,000 ka dugang nga kamatayon sa tibuok kalibotan gikan Hunyo karong tuiga hangtod Pebrero 2027 ang grabeng kainit tungod sa “super-El Niño” karong tuiga, matod sa mga researcher sa University of Chicago’s Climate Impact Lab niadtong Miyerkules.

Posibleng mosaka og 44% ang gidaghanon sa grabeng init nga mga adlaw kumpara sa normal nga mga tuig, matod sa Climate Impact Lab sa usa ka report.

Ang Nigeria ang posibleng makasinati sa kinadak-ang gidaghanon sa dugang nga kamatayon tungod sa kainit gikan Setyembre 2026 hangtod Pebrero 2027, nga mokabat sa 31,400, gisundan sa Indonesia nga adunay 19,300 ug Sudan nga adunay 17,600.

Ang kainit sa Sahel region sa Africa, lakip ang Niger ug Chad ingon man ang Nigeria ug Sudan, posibleng makadugang og 66,800 ka kamatayon sulod sa unom ka bulan.

Gibanabana sa mga researcher nga ang Philippines, Vietnam, Thailand ug Cambodia makasinati og hiniusang dugang nga 19,400 ka kamatayon.

Posibleng mosaka pa ang gidaghanon sa dugang nga kamatayon kung molungtad pa ang El Niño hangtod sa ulahing bahin sa 2027, diin ilabina nga huyang sa epekto niini panahon sa ting-init ang importanteng mga lugar sa northern hemisphere, lakip ang India ug Pakistan.

Gihulagway sa Climate Impact Lab ang El Niño karong tuiga isip usa ka “postcard from the future”, nga nagdala og temperatura nga mahimong normal na sulod lamang sa pipila ka dekada.

Matod niini, kinahanglan ipunting ang mga emergency response effort sa mga rehiyon nga labing prayoridad aron matubag ang mga kamatayon nga may kalabotan sa kainit sa umaabot nga mga bulan.

“This report allows decision makers to see exactly where emergency actions can be taken now to save tens of thousands of lives in the coming months,” matod ni Michael Greenstone, economist sa University of Chicago ug co-founder sa lab. -Ato ni Bai