Spain, nakarekord og 2,149 ka heat-related deaths niadtong Agosto

Gituohang dul-an sa 2,150 ka tawo ang namatay tungod sa mga hinungdan nga may kalabotan sa grabeng kainit sa Spain niadtong Agosto, sumala sa opisyal nga datos niadtong Martes, human nakasinati ang Western Europe og rekord nga mga heatwave atol sa ting-init. - Gipakita sa datos sa MoMo, ang daily mortality monitoring system sa Health Ministry, nga adunay 2,149 ka excess deaths nga nalambigit sa kainit niadtong miaging bulan, ang ikaduhang pinakataas nga ihap alang sa Agosto sukad nagsugod ang pagrekord niadtong 2015, sunod sa rekord sa miaging tuig nga 2,184. - Gibana-bana sa MoMo nga 5,234 ka tawo ang namatay tungod sa mga hinungdan nga may kalabotan sa kainit gikan Mayo 15 hangtod Agosto 31, ang pinakataas nga ihap sa mga namatay nga natala alang sa panahon sa ting-init sukad gilunsad ang monitoring system niadtong 2015, bisan wala pa ang datos alang sa Setyembre. - Natala sa northeastern region sa Catalonia ang pinakadaghang namatay niadtong Agosto, nga mikabat sa 1,164, sumala sa datos, gisundan sa Valencia ug Andalusia nga adunay 227 ug 138 ka namatay, matag usa. - Sa mga namatay, 1,283 ang mga babaye ug 866 ang mga lalaki, samtang 2,064 ang nag-edad og kapin sa 65, lakip ang 1,285 nga nag-edad og kapin sa 85. - Makamatay ang grabeng kainit pinaagi sa pagpahinabo og heat stroke, o pagpasamot sa cardiovascular ug respiratory diseases, diin ang mga tigulang maoy usa sa labing huyang sa epekto niini. - Matod sa weather agency sa Spain nga AEMET, magsugod sa Huwebes ang talagsaong init nga panahon alang sa sayong bahin sa Setyembre ug posibleng molungtad hangtod sa weekend, diin mosaka ang temperatura nga mas taas kaysa kasagarang lebel niini niining panahona. Gilaum nga molapas sa 35 degrees Celsius (95 degrees Fahrenheit) ang pinakataas nga temperatura sa dakong bahin sa inland Spain, uban sa kaylap nga tropical nights diin magpabiling labaw sa 20C ang temperatura. -Ato ni Bai