Russia, miatake og ballistic missiles sa Ukraine human mibiya ang US envoys

Giatake pag-usab sa Russia ang Kyiv, kapital sa Ukraine, sayo sa Martes gamit ang ballistic missiles, pipila ka oras human mibiya ang mga negosyador sa kalinaw sa United States, nga nakaangol sa unom ka tawo, matod ni Kyiv Mayor Vitali Klitschko.

Na-trap usab ang pipila ka tawo sulod sa usa ka residential building samtang adunay mga sunog sa nagkalain-laing bahin sa Kyiv human sa pag-atake, matod ni Klitschko sa Telegram.

Nadaot usab tungod sa nangahulog nga debris ang usa ka lima ka andanang apartment building ug usa ka tulo ka andanang residential building, sumala sa Kyiv Military Administration, nga miawhag sa mga residente nga mosilong sa luwas nga lugar.

Samtang nadungog ang mga pagbuto sa Kyiv, gisugdan sa silingang Poland, nga miyembro sa NATO ug European Union, ang military aviation operations aron panalipdan ang airspace niini batok sa posibleng pagsulod sa langyaw nga aircraft, matod sa armed forces niini sa X.

Gipadayon sa Russia ang mga pag-atake human mibiya ang US peace envoys nga sila Jared Kushner ug Steve Witkoff, kinsa nakigkita kang Ukrainian President Volodymyr Zelenskiy niadtong Domingo, samtang gipakusog pag-usab sa Trump administration ang paningkamot nga tapuson ang upat ug tunga ka tuig nga gubat tali sa Russia ug Ukraine.

Miabot sila gikan sa pakigpulong sa Moscow, diin human niini miingon ang Kremlin nga wala niini gisalikway ang posibilidad nga ipadayon ang three-way negotiations.

Sa Russia, nakadaot usab ang mga drone sa Ukraine sa civilian infrastructure ug nakaangol og mga tawo sa siyudad sa Saratov daplin sa Volga River, mga 730 kilometros sa habagatan-sidlakan sa Moscow, sumala sa regional governor.

Nahimutang sa maong lugar ang usa ka dakong oil refinery nga gipadagan sa state oil company nga Rosneft, ingon man ang ubang industrial ug military facilities.

-Ato Ni Bai