Pulis Napugngan ang Posibleng Kapintasan sa Eskwelahan Human sa Online Threat sa Estudyante

Giluwas sa kapulisan sa General Santos City ang usa ka 15-anyos nga lalaki nga estudyante tungod sa giingong pag-post og mga hulga online batok sa usa ka tunghaan niadtong Martes, matod sa pulis.

Matod ni Brig. Gen. Alan Manibog, director sa Police Regional Office-Soccsksargen (PRO-12), niadtong Miyerkules nga nagpahigayon og rescue operation ang mga personnel sa General Santos City Police Station 3 ug mga operatiba sa Regional Anti-Cybercrime Unit 12 (RACU-12) alas 4:30 sa hapon sa Barangay Hall sa Apopong.

Matod ni Manibog, mitabang sa operasyon ang mga personnel sa barangay social welfare ug ang City Social Welfare and Development Office.

Ang menor de edad gikatahong tag-iya sa usa ka social media account nga nagpadala og mga mensahe nga naghulga og kapintasan batok sa mga estudyante, magtutudlo, personnel sa tunghaan, ug mga security guard, lakip ang mga gipangayo nga may kalabotan sa tulo ka estudyante.

“The messages prompted serious concern within the school community,” matod ni Manibog sa usa ka report.

Midugang si Manibog nga pinaagi sa paspas nga pagresponde sa kapulisan ug gipalig-on nga cyber patrolling ug digital investigation, natino sa mga pulis ang identidad ug nahimutangan sa tag-iya sa account.

Gitugyan ang menor de edad ngadto sa Bahay Pag-asa sa Barangay Sinawal, General Santos City alang sa temporaryong kustodiya ug tukmang intervention.

Matod ni Manibog, girekomenda sa kapulisan ang psychological evaluation ug intervention alang sa bata.

Giubanan sa iyang mga ginikanan ang bata atol sa panaghisgot tali sa mga opisyal sa barangay, kapulisan, social welfare worker, ug representante sa Department of Education.

Gipasiugda sa police director nga gidumala ang insidente uban sa hustong pagtagad sa kaayohan ug mga katungod sa menor de edad samtang gisunod ang tukmang legal nga mga pamaagi.

Matod ni Manibog, ang giingong binuhatan mahimong paglapas sa Article 282 (Grave Threats) sa Revised Penal Code kalabot sa Section 6 sa Republic Act No. 10175, o Cybercrime Prevention Act of 2012, depende sa tukmang assessment sa may katungod nga mga awtoridad.

Niadtong Martes usab, gipatawag sa Tupi municipal police station sa South Cotabato ang usa ka lalaki alang sa pagpangutana aron maklaro ang mga report bahin sa usa ka makapabalak nga social media post nga naglambigit og mga armas sa Barangay Poblacion niadtong Setyembre 20.

Human sa imbestigasyon, gipasaka batok kang alias Roby ngadto sa Office of the Provincial Prosecutor ang reklamo sa Alarm and Scandal ubos sa Article 155 sa Revised Penal Code, kalabot sa Section 6 sa Republic Act 10175.

Ang mobile phone nga nakuha atol sa operasyon ipailalom usab sa technical examination sa Regional Anti-Cybercrime Unit 12 aron makatabang sa pagkuha ug pagpreserbar sa may kalabotang digital evidence.

Gipasiugda ni Manibog ang kamahinungdanon sa dihadiha nga pagreport ug responsableng paggamit sa social media aron malikayan ang dili kinahanglang kahadlok sa komunidad.

“We urge everyone to be responsible when using the social media platform and never post anything that would alarm peace-loving communities,” matod niya. -Ato ni Bai