Pulis mikompirmang walay pagpamusil sa Isulan National High School

Gikompirma sa Police Regional Office-Soccsksargen (PRO-12) niadtong Lunes nga walay nahitabong pagpamusil sa Isulan National High School sa Sultan Kudarat.

Matod ni PRO-12 Director Brig. Gen. Alan Manibog sa pakighinabi sa mga tigbalita, ang kusog nga buto nga nakapakurat sa mga estudyante ug kawani sa eskwelahan niadtong Setyembre 30 gikan sa problema sa kuryente ug dili sa pagpabuto og armas.

Matod ni Manibog, walay nakit-an ang mga pulis nga basiyo sa bala, marka sa bala, armas o ubang pisikal nga ebidensiya nga nagpakita nga adunay nahitabong pagpamusil.

Gikutlo ni Manibog ang taho sa Bureau of Fire Protection (BFP) nga nag-ingong ang kusog nga tingog gikan sa electrical short circuit sa nagkadaot nga service-drop wire, nga nakamugna og kusog nga electrical discharge ug gamayng kadaot tungod sa sunog sa maong lugar.

“No injuries were reported. Sixteen students reportedly fainted during the momentary commotion, but none sustained injuries,” matod ni Manibog.

Dugang niya, wala usab makakitag incendiary materials o ubang kadudahang kahimtang ang mga kawani sa BFP ug girekomendar nga isira na ang kaso samtang gihulat ang opisyal nga taho sa imbestigasyon niini.

Gipasiugda ni Manibog nga ang mga taho nga may kalabotan sa kaluwasan sa mga eskwelahan aksyonan dayon, samtang susihon pag-ayo ang mga kamatuoran sa dili pa mohimo og konklusyon.

“Whenever we receive such a report, we immediately respond to ensure the safety of our students, teachers and school personnel. Along with a swift response, careful validation is also crucial to determine the true cause of the incident and provide the public with accurate and verified information,” matod niya.

Giawhag niya ang publiko nga dili magpakaylap og wala pa mapamatud-ang impormasyon sa social media aron malikayan ang sayop nga pagsabot ug kagubot, ilabi na kon nalangkit ang mga estudyante. -Ato ni Bai