President Marcos, Nanawagan og Panaghiusa sa Paghinumdom kang Ninoy Aquino

Nagpagawas og mensahe si President Ferdinand R. Marcos Jr. niadtong Biyernes agig pagpasidungog sa handumanan ni kanhi Senator Benigno “Ninoy” Aquino Jr., ug nanawagan sa nasud nga magkuha og kusog gikan sa makasaysayang mga baruganan ni Aquino.

Si Aquino ang labing iladong lider sa oposisyon panahon sa rehimen ni President Ferdinand E. Marcos, ang namatay nga amahan sa kasamtangang presidente.

Nailhan isip “Young Man in a Hurry,” napili si Aquino isip labing batan-ong mayor, governor, ug senator sa nasud.

Human gideklarar ang Martial Law niadtong September 1972, gidakop siya isip political prisoner ug napriso sulod sa hapit walo ka tuig.

Samtang anaa sa military detention, nakaagi siya og solitary confinement ug mihimo og 40-day hunger strike isip protesta batok sa rehimen.

Human sa tulo ka tuig nga self-imposed medical exile sa United States, mipili si Aquino nga mopauli aron motabang sa pagpahiuli sa demokrasya sa Pilipinas.

Gipatay siya sa Manila International Airport niadtong August 21, 1983, usa ka trahedya nga nahimong dakong turning point nga nakapalig-on sa oposisyon batok sa diktadurya ug nakaaghat sa 1986 People Power Revolution.

Sa iyang pahayag alang sa Ninoy Aquino Day—nga naghandum sa pagkamatay ni Aquino niadtong 1983—gipasiugda ni President Marcos Jr. ang padayong bili sa maong sakripisyo.

Miingon siya nga ang maong okasyon usa ka higayon aron ilhon ang nangagi ug magkuha niini og determinasyon nga gikinahanglan sa pag-atubang sa mga hagit karon ngadto sa kagawasan ug democratic institutions.

“Ninoy Aquino Day, therefore, invites us to acknowledge the past and draw from it the resolve needed to safeguard freedom, strengthen our institutions, and deepen national unity,” matod ni Marcos Jr.

Giila sa Presidente nga bisan nag-usab na ang matang sa mga hagit nga giatubang sa nasud sa paglabay sa panahon, nagpabiling responsibilidad sa matag lungsoranon ang pagpanalipod sa demokrasya.

Gipasidan-an niya ang mga bag-ong hulga sama sa kaylap nga disinformation, lawom nga pagkabahinbahin sa katilingban, pagkawala sa pagsalig sa mga institusyon, ug pagkawalay pagpakabana sa mga katungdanan isip lungsoranon, nga iyang gihulagway nga mga hinungdan nganong gikinahanglan ang mas aktibong pag-apil sa publiko.

“Ninoy’s legacy encourages us to meet these challenges with vigilance and faith in the Filipino people as we work together to deliver meaningful progress for all,” dugang ni Marcos Jr.

Gitapos ni Marcos Jr. ang iyang mensahe pinaagi sa pag-awhag sa publiko nga gamiton ang mga leksyon sa kasaysayan sa pagtukod og malinawon, nagkahiusa, ug mauswagong Bagong Pilipinas.

Mipasalig siya nga magpabiling determinado ang iyang administrasyon sa pagpatuman sa rule of law, pagpanalipod sa national sovereignty, ug pagsiguro nga ang batakang mga kagawasan duyogan og konkretong economic opportunities alang sa tanang lungsoranon.

Samtang, miingon ang Aquino Museum sa Tarlac City nga libre ang admission sa August 21 isip paghandum sa anibersaryo sa pagkamatay ni kanhi Senator Aquino. Adunay guided tours sa 10:00 a.m. ug 2:00 p.m.

-Ato ni Bai