Pope Leo nagpasiugda og tigom sa Vatican bahin sa pamilya ug LGBT nga mga Katoliko

Giawhag ni Pope Leo ang mga 150 ka obispo gikan sa nagkalain-laing nasud nga mangitag "renewed ways" aron matabangan ang mga pamilya karong panahona, sa pagsugod sa usa ka semana nga tigom sa Vatican. Kini ang kinadak-ang tigom sa mga lider sa Simbahan nga iyang gipahigayon sukad nahimo siyang Santo Papa.

Ang tigom, nga molungtad hangtod Oktubre 14, maghisgot sa mga pagtulon-an sa Simbahang Katoliko bahin sa kinabuhi sa pamilya. Gilaoman nga mahisgutan usab ang mga kontrobersiyal nga isyu sama sa pagtratar sa Simbahan sa mga miyembrong LGBT ug sa mga Katolikong nagdiborsyo ug naminyo pag-usab, bisan wala kini pormal nga gilakip sa mga hilisgutan sa tigom.

Nag-ampo si Leo nga ang Diyos "give us the freedom to listen to one another, the wisdom to recognise his work among his people, and the courage to follow where he leads us."

Gitawag sa Santo Papa ang tigom uban sa mga pangulo sa mga kapunongan sa Katolikong obispo sa tibuok kalibotan aron sa pagsaulog sa ika-10 nga anibersaryo sa usa ka importanteng dokumento nga gisulat niadtong 2016 sa iyang gisundan nga si Pope Francis, nga namatay na.

Ang maong dokumento nga giulohan og "Amoris Laetitia" (The Joy of Love), nag-awhag sa Simbahan nga mahimong dili kaayo estrikto ug mas maluluy-on sa mga Katolikong giisip nga "imperfect", sama sa mga nagdiborsyo ug naminyo pag-usab.

Ubos sa kasamtangang pagtulon-an sa Simbahan, dili makadawat og komunyon ang mga Katolikong naminyo pag-usab gawas kon dili sila makighilawas sa ilang bag-ong kapikas, tungod kay giila gihapon sa Simbahan nga balido ang ilang unang kaminyoon.

Daw giablihan ni Francis ang posibilidad nga makadawat og komunyon ang mga Katolikong naminyo pag-usab, human niyang isulat sa usa ka nota sa dokumento niadtong 2016 nga mahimo silang makadawat sa "the help of the sacraments". Apan wala siya maglatid og klarong palisiya nga sundon sa tibuok Simbahang Katoliko.

Wala direktang hisgoti ni Leo ang maong isyu sa iyang mga pahayag niadtong Miyerkules, apan matod niya, kinahanglan nga ang Simbahan "recognise the work of grace even in situations marked by limits, wounds and apparent failure".

Miapil sa tigom ang mga obispo gikan sa kapin 115 ka nasud, lakip ang duha gikan sa China. Niadtong 2018, nakab-ot sa China ug ni Francis ang usa ka kontrobersiyal nga kasabotan nga nagpauli sa normal nga pagpili ug pagtudlo sa mga Katolikong obispo sa nasud human sa daghang dekada nga panagbangi.

Miapil usab ang 11 ka magtiayong Katoliko nga dili mga pari o madre, nga gilaom nga mopaambit sa ilang mga kasinatian sa kinabuhi. -Ato ni Bai