Pope Leo misupak sa death penalty samtang gikonsiderar ni Trump ang livestream sa pagpatay sa piniriso

Gisubli ni Pope Leo niadtong Sabado ang iyang pagsupak sa death penalty, nga matod niya naglapas sa pagkabalaan sa kinabuhi sa tawo ug naghikaw sa oportunidad nga makabag-o ang usa ka tawo. Kini human sa pipila ka adlaw sukad gipahibalo sa Pentagon ang plano niini nga i-livestream ang pagpatuman sa silot nga kamatayon sa usa ka piniriso.

I-livestream sa militar sa Estados Unidos ang umaabot nga pagpatuman sa silot nga kamatayon pinaagi sa firing squad sa usa ka gunman nga mipatay og 13 ka tawo sa Fort Hood military base niadtong 2009, matod ni Defense Secretary Pete Hegseth niadtong Huwebes. Kini ang mahimong unang higayon nga i-broadcast ang pagpatuman sa silot nga kamatayon sa Estados Unidos.

"The common good can be safeguarded and the requirements of justice can be met without recourse to capital punishment," matod ni Leo, ang unang papa nga gikan sa Estados Unidos, sa usa ka social media post, nga wala maghisgot sa plano sa Pentagon.

"The death penalty is inadmissible because it is an attack on the inviolability and dignity of the person," dugang niya sa mensahe nga gipatik atol sa World Day Against the Death Penalty.

Si Nidal Hasan, usa ka kanhing Army psychiatrist, gikatakdang mahimong unang tawo nga patyon pinaagi sa firing squad sa militar sa Estados Unidos sukad niadtong 1945.

Ang plano sa livestream, nga gisuportahan ni Hegseth, gisupak sa mga magbabalaod, lakip ang mga kaalyado ni President Donald Trump sa Republican Party, mga lider sa relihiyon, ug mga internasyonal nga tigpaniid.

Si Trump mismo miingon nga wala pa siya makahukom kon tugotan ba ang live broadcast, samtang si Vice President JD Vance, nga usa ka Katoliko, nagpahayag og pagduhaduha kon ipadayon ba sa Pentagon ang livestream sa gikatakdang pagpatuman sa silot nga kamatayon sa Disyembre 3.

Miingon usab si Vance nga dili siya motan-aw sa livestream kon kini madayon.

Ang plano sa pagpatuman sa silot nga kamatayon nahitabo taliwala sa nagkakusog nga debate sa Estados Unidos bahin sa death penalty human sa napakyas nga pagpatuman sa lethal injection sa usa ka babaye sa Tennessee niadtong miaging semana.

-Ato ni Bai