Pope Leo, mibalik sa Vatican human sa operasyon sa kanser sa baga

Mibalik sa Vatican si Pope Leo niadtong Sabado sa hapon human makagawas sa usa ka ospital sa Rome, upat ka adlaw sukad siya gioperahan tungod sa kanser sa baga.

Nakalakaw nga walay tabang ang 71-anyos nga Santo Papa padulong sa sakyanan nga naghulat kaniya. Mihunong usab siya aron makig-estorya sa mga tawo nga naghulat ug nangumusta kaniya sa gawas sa Gemelli Hospital sa Rome.

Una nang mipahibalo ang iyang mga doktor nga maayo na ang iyang kondisyon aron makapauli human sa pinakabag-ong mga blood test ug chest imaging nga ilang gihimo.

Gikuha atol sa operasyon niadtong Martes ang ubos nga bahin sa tuo nga baga sa Santo Papa. Gikatakda siyang mopahigayon sa iyang unang publikong kalihokan sukad sa operasyon karong Domingo, diin manguna siya sa sinemana nga pag-ampo uban sa mga pilgrim sa St. Peter's Square sa udto (1000 GMT).

Nadiskobrehan nga adunay lung adenocarcinoma si Leo, ang labing komon nga matang sa kanser sa baga. Nakapakurat ang iyang diagnosis tungod kay giila ang Santo Papa nga medyo bata pa ug aktibo, ug bag-o pa lamang siyang napili niadtong Mayo 2025. Nagpatungha usab kini og mga pangutana bahin sa umaabot nga direksiyon sa iyang papasiya samtang nag-atubang siya sa maong sakit.

Matod sa mga doktor sa Santo Papa, malampusong nahuman ang iyang operasyon nga walay komplikasyon. Apan wala pa nila ipadayag ang gidak-on sa tumor o kon mikaylap na ba ang kanser ngadto sa duol nga mga lymph node, nga importanteng mga hinungdan sa pagtino sa posibleng dagan sa iyang kondisyon.

-Ato ni Bai