Pope Leo miaprubar kang Cardinal Tagle isip unang Asian dean sa mga cardinal

VATICAN CITY — Giaprobahan ni Pope Leo ang pagkapili kang Filipino Cardinal Luis Antonio Tagle isip dean sa College of Cardinals sa Catholic Church, sumala sa Vatican niadtong Biyernes. Si Tagle ang unang Asian nga napili nga mangulo sa maong grupo sa mga cardinal nga maoy mopili sa mosunod nga Santo Papa human ni Leo.

Si Tagle, kanhi archbishop sa Manila, nagsilbi isip taas nga opisyal sa Vatican sukad 2020. Giisip siya sa kadaghanan nga usa sa posibleng mapili nga Santo Papa atol sa conclave niadtong Mayo 2025, diin napili si Leo nga mangulo sa Simbahan human sa pagkamatay ni Pope Francis.

Si Tagle, 69, maoy mopuli kang Italian Cardinal Giovanni Battista Re, 92, nga moretiro na sa maong posisyon.

Si Leo, 71, giisip nga medyo batan-on pa alang sa usa ka Santo Papa, aktibo sa sports ug adunay maayong panglawas.

Ang dean sa College of Cardinals giisip nga "first among equals" taliwala sa labing taas nga mga opisyal sa Simbahan. Siya usab ang responsable sa pagdumala sa sekretong proseso sa conclave nga himuon sa Sistine Chapel kon mamatay o moluwat sa katungdanan ang Santo Papa.

Ubos sa balaod sa Simbahan, ang dean pilion sa iyang kaubang mga cardinal ug aprobahan sa Santo Papa. Mosilbi siya sulod sa lima ka tuig ug mahimong mapalugwayan ang iyang termino sa usa pa ka higayon.

Kasagaran, mga European ang naghupot sa maong posisyon, apan nagsilbi usab niini ang namatay nang Beninese Cardinal Bernardin Gantin gikan 1993 hangtod 2002.

Gitan-aw si Tagle isip suod nga kaalyado ni Pope Francis ug nailhan sa iyang kanunay nga pahiyom. Usahay tawgon usab siya sa iyang angga nga "Chito".

Siya ang nangulo sa Dicastery for Evangelization sa Vatican, nga maoy nagdumala sa mga misyonaryong kalihokan sa Simbahan.

-Ato ni Bai