PhilHealth nagpasidaan batok sa mga peke nga text bahin sa pag-ilis og ID

Gipasidan-an sa Philippine Health Insurance Corp. (PhilHealth) niadtong Miyerkules ang publiko batok sa mga peke nga text message nga nag-ingong kinahanglan ilisan sa mga miyembro ang ilang PhilHealth ID pinaagi sa usa ka link sa internet.

Sa usa ka pahibalo, giklaro sa PhilHealth nga wala kini proseso sa pag-ilis og ID pinaagi sa text message o mga link sa internet.

Gipasidan-an usab niini nga mahimong manipulahon sa mga mangingilad ang mga text message aron magpakita nga gikan kini sa mga opisyal nga tinubdan. Ang mga peke nga mensahe mahimo pa gani nga makita sa samang panag-istoryahanay sa text diin nadawat ang mga tinuod nga pahibalo gikan sa PhilHealth.

“This message is FAKE. PhilHealth has no ID replacement process that is done through text messages or online links,” matod sa PhilHealth.

Giklaro sa PhilHealth nga dili kini magpadala og mga text message nga adunay link o mangayo og password, one-time PIN (OTP), impormasyon sa bank account, o mga detalye sa e-wallet.

Dili usab kini mangayo sa mga miyembro nga magpadala og kuwarta o mobayad og bayranan pinaagi sa text message.

Gitambagan sa ahensya ang mga miyembro nga makigtransaksiyon lamang pinaagi sa mga opisyal nga paagi, lakip ang Local Health Insurance Offices, Member Portal, ug eGovPH application.

Ang mga miyembro nga makadawat og kadudahang mensahe mahimong moreport sa PhilHealth Action Center pinaagi sa email o sa opisyal nga Facebook account niini nga @PhilHealthOfficial. Mahimo usab silang moreport pinaagi sa landline ug mga hotline sa PhilHealth. -Ato ni Bai