PH Nagduso sa Lokal nga Class Suspensions Tungod sa Daotang Panahon

Giawhag sa Department of Education (DepEd) ang mga local government units nga himuong espesipiko ug lokal kutob sa mahimo ang pagsuspenso sa klase tungod kay adunay mga eskwelahan nga nawad-an na og kapin sa 20 ka adlaw sa pagkat-on tungod sa mga pagkabalda sukad sa pagsugod sa school year.

Miingon si DepEd Secretary Sonny Angara niadtong Huwebes nga pinaagi sa lokal nga pagsuspenso, makapadayon sa face-to-face classes ang mga eskwelahan sa mga lugar nga wala maapektuhan samtang masiguro ang kaluwasan sa mga estudyante sa mga lugar nga adunay peligro.

“Our request is simple: be specific when you suspend. If the risk is limited to certain areas, identifying those areas can help schools in unaffected areas continue learning,” matod ni Angara sa usa ka pahayag.

Hangtod niadtong Setyembre 11, aberids nga upat ka adlaw sa pagkat-on ang nawala sa mga school divisions sa tibuok nasod, bisan og dakog kalainan ang epekto sa matag rehiyon ug lokalidad.

Narekord sa Central Luzon ang aberids nga siyam ka nawalang adlaw sa pagkat-on, diin 26 niini sa Pampanga. Sa Soccsksargen, 8.4 ka adlaw ang aberids, samtang 28 ang narekord sa Sarangani. Sa Metro Manila, 8.2 ka adlaw ang aberids, diin 25 ang narekord sa Caloocan.

“The national average does not tell the whole story. Conditions can be very different even within the same region or local government,” matod ni Angara.

Gihatag niyang pananglitan ang Calumpit, Bulacan, diin padayon nga naapektuhan sa baha ang pipila ka eskwelahan samtang ang uban gigamit isip evacuation centers. Giila sa local government ang espesipikong mga eskwelahan nga naapektuhan, nga nakapahimo sa ubang eskwelahan nga makabalik sa face-to-face classes.

Gihimo sa DepEd ang maong panawagan samtang nagtrabaho ang gobyerno sa gisugyot nga executive order bahin sa pagsuspenso ug pagpadayon sa klase ug trabaho sa mga institusyon sa edukasyon.

Ubos sa gisugyot nga sistema, mahimong awtomatiko, lokal, o espesipiko sa usa ka lugar ang pagsuspenso ug pagpadayon sa klase, depende sa matang ug gilapdon sa peligro.

Hangtod niadtong Setyembre 10, 34,775, o 72.49 percent, sa mga eskwelahan sa DepEd sa tibuok nasod ang nakapatuman og pagsuspenso sa klase sukad sa pagsugod sa school year.

ESPESIPIKONG PAGPADAYON SA KLASE

Miingon si Angara nga magpabiling prayoridad ang kaluwasan kon magpatuman ang local governments og kinatibuk-ang pagsuspenso, apan mahimong makapadayon ang mga eskwelahan sa klase sa espesipikong mga lugar sa higayon nga makumpirmang luwas na ang kahimtang.

“We are not asking schools to override an LGU suspension. Safety must first be established, and the required coordination or concurrence with the LGU is there to ensure that everyone is working from the same information and that there are no conflicting announcements,” matod niya.

Ubos sa gisugyot nga granular resumption policy, maghimo ang mga eskwelahan og dokumentado ug espesipikong pagsusi sa matag lugar aron matino kon luwas ba ang kahimtang alang sa face-to-face classes. Magpabilin kini nga ubos sa koordinasyon o pagtugot sa hingtungdang LGU, ilabina kon aduna nay gideklarang pagsuspenso.

Miingon si Angara nga tumong sa maong sistema nga malikayan ang nagkasumpaking mga pahibalo ug mamenosan ang kalibog sa mga estudyante, ginikanan, magtutudlo, ug komunidad.

“This is why the proposed Executive Order provides a more responsive framework for decisions based on actual conditions,” matod niya.

“Safety first, but when it is safe, we should also protect learning time. The objective is to suspend when and where the risk warrants it, resume when conditions are safe, and keep learning going wherever possible.”

-Ato ni Bai