Pakistan Mibalos og Airstrikes sa Afghanistan

Nagpahigayon ang Pakistan og airstrikes sa 10 ka lugar sa Afghanistan nga matod niini gigamit sa paglunsad ug pagtipig og mga drone, nga ang pipila niini gigamit batok sa Pakistan usa ka adlaw ang milabay, matod ni Information Minister Attaullah Tarar niadtong Huwebes.

Nahimo ang mga pag-atake samtang nagkagrabe ang tensiyon tali sa kanhing mga kaalyado nga karon nagkaaway, nga dugay nang adunay lalis tungod sa mga pag-atake sa Islamist militants, nga misangpot usab sa ilang pinakagrabeng panagsangka sulod sa daghang tuig niadtong Pebrero.

Giakusahan sa Islamabad ang Kabul nga naghatag og tagoanan sa mga militanteng naglunsad og mga pag-atake tabok sa utlanan, apan gipanghimakak sa Taliban government sa Afghanistan nga naghatag kini og tagoanan sa anti-Pakistani insurgents ug miingon nga ang militancy internal nga problema sa Pakistan.

Namatikdan sa air defence systems sa Pakistan niadtong Miyerkules ang mga drone nga gilunsad gikan sa teritoryo sa Afghanistan, nga gisubay ug gi-neutralize sa wala pa kini makaabot sa bisan asa sa ilang gitumong nga target, matod ni Tarar sa usa ka post sa X.

Human niini, nagpahigayon ang Pakistan sa “precision aerial and drone strikes” sa 10 ka lugar, nga “limited to identified military objectives” nga nalambigit sa gisulayang mga pag-atake, matod niya.

“Any further provocative act by Afghan Taliban will be responded with firm and resolute response,” matod sa ministro.

Gipahigayon ang airstrikes sa Pakistan sa pipila ka lugar sa habagatan-sidlakang Khost province, matod ni Mustaghfir Gurbaz, spokesperson sa Khost governor.

Wala’y namatay o nasamdan, matod niya.

Mipabalik sa panagsangka tali sa duha ka nasod ang pag-atake sa usa ka pasilidad sa kapulisan sa amihanan-kasadpang Pakistan sa miaging semana, nga nakapatay og labing menos 24 ka tawo, human sa dul-an sa tulo ka bulan nga medyo malinawon nga kahimtang.

Miingon usab ang gobyerno sa Pakistan sayo ning semanaha nga nagpahigayon kini og airstrikes sa border region sa Afghanistan-Pakistan, nga nakapatay og 28 ka militante, samtang giakusahan sa mga opisyal sa Afghan Taliban ang Islamabad nga nakapatay og tulo ka sibilyan sa mga pag-atake sa teritoryo sa Afghanistan sa kagabhion.

Apan nahitabo niadtong Marso ang pinakagrabeng insidente, diin kapin sa 400 ka tawo ang namatay sa usa ka airstrike sa Pakistan sa Kabul, nga matod sa Afghan Taliban naigo ang usa ka drug rehabilitation centre.

Gipanghimakak sa Islamabad ang maong akusasyon, nga miingon nga “precisely targeted military installations and terrorist support infrastructure” ang ilang giatake -Ato ni Bai