Pagwagtang sa death penalty sa ubang nasod sa ASEAN, giduso sa panaghisgot

Gipangunahan ni kanhi Presidente Gloria Macapagal-Arroyo ang usa ka trilateral dialogue tali sa Pilipinas, Timor-Leste, ug Cambodia sa Department of Justice (DOJ) sa Manila niadtong Biyernes.

Miingon si DOJ Undersecretary Raul Vasquez nga gitutokan sa panagtagbo ang pag-awhag sa ubang mga miyembro sa Association of Southeast Asian Nations (ASEAN) nga mosuporta sa pagwagtang sa death penalty.

Giwagtang na sa Pilipinas, Timor-Leste, ug Cambodia ang death penalty. “We discussed how to champion abolition strategy to convince other ASEAN countries to follow anti-death penalty laws and if possible in their constitution," matod ni Vasquez.

"We agreed to initiate efforts, an information campaign, person to person, as well as meeting with like-minded groups and individuals," dugang niya.

Ang Pilipinas usa sa 170 ka nasod nga mipirma sa 1976 International Convention on Civil and Political Rights.

Matod ni Vasquez, ang ikaduhang optional protocol sa maong kasabotan nagtumong sa pagwagtang sa death penalty.

Niadtong 2006, sa panahon sa iyang pagkapresidente, gipirmahan ni Arroyo ang Republic Act (RA) 9346, o An Act Prohibiting the Imposition of Death Penalty in the Philippines.

Gibawi sa maong balaod ang RA 7659 (Death Penalty Law) ug RA 8177 (Lethal Injection Act), lakip ang ubang mga balaod, decree, ug executive order nga supak niini.

Alang sa mga krimen nga kaniadto adunay silot nga kamatayon, gipulihan kini og reclusion perpetua, nga adunay kinatas-ang sentensiya nga 40 ka tuig, kon ang kalapasan sakop sa Revised Penal Code. Samtang life imprisonment ang ipahamtang kon ang kalapasan sakop sa special penal laws.

Ang mga tawo nga nakonbikto sa mga krimen nga adunay silot nga reclusion perpetua, o kadtong gipaubos ang ilang sentensiya ngadto sa reclusion perpetua, dili kwalipikado sa parole ubos sa RA 4103 o Indeterminate Sentence Law.

Miingon si Vasquez nga dakong hagit ang pagduso sa pagwagtang sa death penalty sa tanang miyembro sa ASEAN tungod sa kalainan sa ilang mga sistema sa politika, legal nga tradisyon, ug kultura.

-Ato ni Bai