Pagpauswag sa PhilHealth autism benefit gipanawagan ni Sen. Villanueva

Nanawagan si Sen. Joel Villanueva sa Department of Health (DOH) ug Philippine Health Insurance Corporation (PhilHealth) nga pauswagon ang autism spectrum disorder (ASD) benefit package sa gobyerno tungod sa gamay kaayong nakapahimulos niini sukad gilunsad niadtong 2017.

Atol sa Senate budget hearing alang sa gisugyot nga 2027 budget sa DOH ug PhilHealth, gipangutana ni Villanueva kon igo ba nga makaabot sa mga Pilipinong adunay ASD ug ubang developmental conditions ang ₱74.45 bilyon nga subsidy alang sa National Health Insurance Program.

“A promise on paper is not the same as help in hand. In eight years, this benefit has reached only 482 families,” matod ni Villanueva. “We appreciate PhilHealth’s commitment today, and we don’t have to wait for a new law to start closing that gap.”

Giila ni PhilHealth President ug CEO Dr. Beverly Lorraine C. Ho nga gamay ra ang nakapahimulos sa programa, diin 482 lamang ka claims sa tibuok nasud ang nabayaran sulod sa walo ka tuig. Matod niya, usa sa nag-unang hinungdan niini mao ang grabeng kakulang sa accredited providers, tungod kay lima lamang ka pasilidad sa nasud ang kasamtangang awtorisadong mohatag sa maong serbisyo.

Gikuwestiyon usab ni Villanueva kon igo ba ang kasamtangang benepisyo. Bisan og nag-cover ang package og hangtod 90 ka therapy sessions, ₱3,000 hangtod ₱5,000 lamang ang bayad niini alang sa diagnostic assessment—mas ubos kumpara sa aktuwal nga gasto sa mga pamilya aron makakuha og opisyal nga autism diagnosis.

Gihisgutan usab sa senador ang Senate Bill No. 1822 o National Autism Care, Support, and Inclusion Act, nga nakapasar sa ikatulo ug kataposang pagbasa sa Senado niadtong Marso, isip dugayng solusyon aron mapalapad ang PhilHealth coverage alang sa mga tawo nga adunay ASD.

Sa tubag, miingon si Ho nga gitapos na sa PhilHealth ang updated policy nga gilaum ipagawas sa dili pa matapos ang tuig. Subay sa direktiba sa Presidente atol sa bag-ohay nga State of the Nation Address, doblehon sa giusab nga package ang benefit rates ug ang gidaghanon sa covered consultations.

Aron matubag ang kakulang sa providers, giusab usab sa PhilHealth ang accreditation guidelines aron tugotan ang occupational ug speech therapists nga mahimong accredited base sa ilang professional license imbes nga kinahanglan pa sila adunay kaugalingong physical clinic. Gipalapad usab sa ahensya ang screening ug training program alang sa barangay health workers ug daycare personnel kauban ang Developmental Pediatrics Society.

Gipangutana usab ni Villanueva si Health Secretary Edwin Mercado bahin sa kakulang sa speech-language pathologists, occupational therapists, ug physical therapists sa tibuok nasud, lakip kon pila ka posisyon ang pondohan ubos sa 2027 health worker deployment strategy sa DOH.

Gipasabot ni Mercado nga mokabat og upat hangtod lima ka tuig ang pagbansay sa maong mga espesyalista ug daghan sa mga graduates ang mangabroad tungod sa mas maayong sweldo. Matod niya, ang pagpalapad sa PhilHealth coverage ug pagpaayo sa professional fees mahimong makatabang aron mas daghang espesyalista ang magpabilin sa Pilipinas.

“A law on paper does not put a therapist in a clinic. If we don’t make it worthwhile for our own graduates to stay and practice here, families will keep waiting no matter how many laws we pass,” matod ni Villanueva. “We’re ready to work with DOH, PhilHealth, and our schools to change that.”

Gikumpirma ni Villanueva nga makig-coordinate ang iyang opisina sa PhilHealth ug DOH alang sa temporaryong mga solusyon samtang gihisgutan pa sa House of Representatives ang counterpart bill niini. -Ato ni Bai