Pagkahugno sa Agana Bridge: Usa nakit-ang patay sa Dagupan, tulo nagpabiling missing

Nakuha sa Philippine Coast Guard (PCG) ang lawas sa usa sa lima ka sakay sa usa ka sakyanan nga nahulog sa Tarlac River human partially nahugno ang Agana Bridge sa Tarlac City niadtong Sabado.

Sa usa ka pahayag niadtong Martes, miingon ang PCG nga nakuha ang lawas sa katubigan duol sa Barangay Pugaro, Dagupan City, Pangasinan niadtong Domingo.

Si Nataniel Dizon, 20, lamang ang nakaluwas sa insidente, samtang tulo pa ang nagpabiling missing.

Mga udto niadtong Domingo, nakadawat ang PCG Station Dagupan og report bahin sa usa ka naglutaw nga patayng lawas nga nakita sa usa ka operator sa motorbanca duol sa Barangay Pugaro.

Mipadala dayon ang PCG og response team aron susihon ang report ug kuhaon ang lawas.

Gikumpirma sa PCG responders ang report ug nakuha ang lawas, nga dayong gidala sa Barangay Poblacion Oeste ug gitugyan sa Dagupan City Police Station 5 alang sa hustong pagdumala.

Sa ulahi, gikumpirma ni Tarlac City Mayor Susan Yap nga ang nakuha nga lawas usa sa mga biktima sa insidente sa Agana Bridge.

Nagpadayon ang search and rescue operations alang sa nahibiling mga missing, diin gipangita sa response teams ang Tarlac River ug mga lugar sa ubos nga bahin niini, kauban ang mga hingtungdang awtoridad.

Miingon ang PCG nga hangtod alas-6 sa gabii niadtong Lunes, nasusi na sa responders ang mga 35 kilometro sa Tarlac River gikan sa Barangay Aguso paingon sa Ablang River sa Paniqui, Tarlac.

Gipalapdan usab sa search teams ang ilang pagpangita paingon sa Ablang Bridge ug Paniqui Bridge, apan wala gihapoy nakit-an.

-Ato Ni Bai