Pag-atake sa Houthis sa Saudi Airport Nakapatay og 12 Ka Tawo

Namatay ang labing menos 12 ka tawo ug kapin sa 300 ang nasamdan sa pag-atake sa international airport sa Riyadh niadtong Sabado. 

Kini ang pinakagrabeng pag-atake sa Saudi Arabia sulod sa kapin usa ka dekada, samtang gipakusog sa Houthis nga gisuportahan sa Iran ang ilang kampanya nga gisugdan niadtong ting-init.

Lakip sa mga namatay sa ikatulong pag-atake sa airport karong semanaha ang upat ka Saudi, duha ka Bangladeshi, ug tagsa-tagsa ka tawo gikan sa US, Jordan, Palestine, Syria, Sudan ug Egypt, sumala sa Saudi civil aviation authority. Miabot na sa 309 ang nasamdan, matod sa mga opisyal.

Miingon si President Donald Trump nga gikonsiderar sa Washington ang pag-apil sa mga pag-atake sa Saudi Arabia batok sa Houthis. Ang panagbangi nalambigit sa gubat batok sa Iran nga gisugdan sa US ug Israel niadtong Pebrero.

Napuno sa mga nasamdan ang mga ospital human sila gidala pinaagi sa mga ambulansya ug helicopter. Ang pipila anaa sa kritikal nga kahimtang human sa kalit nga pag-atake nga walay pasidaan.

MISAMOT ANG PANAGBANGI HUMAN NABUNGKAG ANG CEASEFIRE SA YEMEN

Nakapamatay og upat ka tawo ang duha ka naunang pag-atake sa King Khalid International Airport karong semanaha ug nakahatag og dakong kadaot sa usa ka komersiyal nga eroplano sa Saudi Arabia nga nakaparada sa airport. Gipakita sa mga pag-atake ang mga kahuyang sa depensa sa Saudi Arabia samtang nagpadayon kini sa mga pag-atake gikan sa kahanginan batok sa Houthis aron suportahan ang gubat sa yuta nga gipangulohan sa gobyerno sa Yemen batok sa grupo nga gisuportahan sa Iran.

Wala pa angkonon sa Houthis ang responsibilidad sa pag-atake, apan misaad ang koalisyon sa militar nga gipangulohan sa Saudi Arabia nga motubag niini.

Sa dihang gipangutana kung moapil ba ang US sa mga pag-atake sa Saudi Arabia batok sa Houthis, mitubag si Trump sa mga tigbalita: "We may. We're going to look at it. We just found out about the recent attack, so we'll make a decision. We move very quickly."

Gikondena ni US Secretary of State Marco Rubio ang mga pag-atake sa airport, nga matod niya "demonstrate a blatant disregard for innocent civilian life". Gikondena usab ni UN Secretary-General Antonio Guterres ang pag-atake niadtong Sabado ug gipahinumdom nga ang pag-atake sa mga sibilyan ug mga pasilidad nga gigamit nila supak sa internasyonal nga balaod ug kinahanglan hunongon dayon.

Giangkon sa Saudi Arabia ug sa gobyerno sa Yemen nga nakahimo sila og ginatos ka pag-atake sa mga target sa teritoryong kontrolado sa Houthis. Matod sa Houthis, nakapatay kini og mga sibilyan, lakip ang mga babaye ug bata. Wala independente nga mapamatud-i sa Reuters ang maong mga pahayag.

Misulod ang Saudi Arabia sa gubat sa Yemen niadtong 2015 isip lider sa usa ka koalisyon sa mga nasod nga Arabo aron papahawaon ang Houthis gikan sa kapital sa Yemen nga Sanaa. Apan nahimong dugay ug madugo nga panagbangi ang gubat, diin ginatos ka libong Yemeni ang namatay tungod sa panagsangka ug kagutom.

Nabungkag niadtong ting-init ang ceasefire nga nakab-ot sa Saudi Arabia ug Houthis niadtong 2022. Misangpot kini sa paspas nga pag-abante sa Houthis ug pag-ilog sa Bab el-Mandeb, usa ka importanteng agianan sa Red Sea, gikan sa mga pwersa sa gobyerno nga gisuportahan sa Saudi Arabia.

PAGBUTO, MGA NASAMADAN UG MGA AMBULANSYA

Nagsugod og opensiba karong semanaha ang gobyerno sa Yemen nga gisuportahan sa Saudi Arabia aron mabawi ang maong teritoryo. Apan hinay lamang ang ilang pag-abante, samtang gilibotan sa Houthis ang Taiz, ang ikatulong pinakadakong siyudad sa Yemen.

Niadtong Sabado, gibalhin ngadto sa ubang tugpahanan ang tanang biyahe sa eroplano paingon sa Riyadh ug gihunong ang operasyon sa airport nga nagserbisyo sa siyudad nga adunay 8 milyon ka residente, sumala sa Saudi civil aviation authority.

Gipahibalo sa pangulo sa media office sa Houthis pinaagi sa X nga ang grupo "shut down Riyadh international airport". Miingon usab ang Houthis nga ang mga eroplano sa pasahero kinahanglan molikay sa kahanginan sa Saudi Arabia tungod kay gideklarar nila kini nga lugar sa mga operasyon sa militar.

Gipasidan-an sa Houthis ang mga internasyonal nga airline nga dili moagi sa kahanginan sa Saudi Arabia tungod kay nahimo na kining lugar sa ilang mga operasyon sa militar. Gawas lamang niini ang kahanginan ibabaw sa balaang mga siyudad sa Mecca ug Medina.

Usa ka nakasaksi sa airport ang miingon nga nakakita siya og pagbuto ug daghang nasamdan nga nangahigda sa salog sa sulod sa pasilidad. Kapin sa usa ka dosena ka ambulansya ang nakitang nagdali padulong sa airport. Gipakita usab sa usa ka video nga napamatud-an sa Reuters ang mga ambulansya sa airport.

Usa ka nasamdan nga pasahero ang misulti sa Reuters nga nakakita siya og butang nga milupad sa kalangitan sa gawas sa airport sa wala pa nahugno ang bahin sa kisame duol sa usa ka departure gate.

Gipahibalo sa US embassy sa Riyadh nga kini "strongly recommends all US citizens avoid this airport and surrounding areas."

Tungod sa naunang mga pag-atake sa Houthis, daghang airline ang mihunong o mikansela sa ilang mga biyahe paingon sa kapital sa Saudi Arabia. Nahitabo kini samtang nangandam ang Riyadh sa pag-host sa dagkong mga komperensya bahin sa enerhiya ug pamuhunan.

Sa wala pa ang mga pag-atake niadtong Sabado, miingon ang mga organizer nga magpadayon ang maong mga kalihokan sumala sa plano. -Ato ni Bai