Outbreak sa Ebola sa Congo adunay pinakadaghang kaso sa unang bulan kumpara sa ubang outbreak sa Africa — WHO

Ang outbreak sa Ebola sa Democratic Republic of the Congo (DRC) adunay pinakadaghang kumpirmadong kaso sulod sa unang bulan kumpara sa bisan unsang Ebola outbreak sa Africa, sumala sa usa ka senior official sa World Health Organization (WHO).

Ang Bundibugyo strain outbreak sa DRC, nga nakaimpeksyon na sa kapin sa 1,000 ka tawo ug nakapatay sa 267, nadiskobrehan nga ulahi na. Matud sa mga eksperto, posible nga naglibot na ang virus sulod sa pipila ka bulan sa wala pa kini opisyal nga gideklarar niadtong Mayo 15.

Matud ni WHO official Abdirahman Mahamud, nga bag-o lang mibalik gikan sa sentro sa outbreak sa Bunia, kinahanglan pa nga palapdan ang mga lakang sa pagtubag aron masabtan ug mapugngan ang padayon nga pagsaka sa mga kaso.

Ang duha ka labing dagkong Ebola outbreak sa wala pa kini mao ang outbreak sa West Africa tali sa 2014 ug 2016 sa Guinea, Sierra Leone, ug Liberia nga nakapatay og kapin sa 11,000 ka tawo, ug ang outbreak sa Congo niadtong 2018 nga mas ubos ang mortality rate.

Sumala sa mga report, adunay na usab mga kaso sa Ebola nga natala sa labing menos tulo ka evacuation ug displacement camps sa silangang bahin sa Congo. Giingon sa International Organization for Migration (IOM) nga labing menos 25 ka kaso na ang nakumpirma sa maong mga kampo, lakip ang 14 ka namatay.

Sumala sa U.S. Centers for Disease Control and Prevention (CDC), adunay na kapin sa 20 ka Ebola outbreaks nga natala sa sub-Saharan Africa.

-Ato ni Bai