Nepal, nagdeklarar og nasudnong pagbangotan human sa makamatay nga baha

Misulod sa tradisyonal nga kataposang adlaw sa pagbangotan ang mga Nepali niadtong Lunes alang sa gatusan nga namatay sa grabeng baha sa utlanan sa nasud sa China, samtang nagpadayon ang search operations human maluwas ang upat ka tawo sa miaging mga adlaw.

Gipaubos sa tunga ang nasudnong bandera sa mga opisina sa gobyerno sa Nepal ug sa mga diplomatic mission niini sa gawas sa nasud aron markahan ang ika-13 nga adlaw human sa kamatayon, matod sa Home Ministry. Giisip kini sa mga Hindu nga kataposang adlaw sa pagbangotan, diin gihimo ang mga ritwal ug paghalad og pagkaon.

Nahugno ngadto sa usa ka suba sa Himalayan border sa Nepal ug Tibet sa China niadtong Agosto 26 ang dakong pundok sa lapok ug bato human maputol ang bahin sa usa ka glacier. Gibanlas niini ang mga lungsod ug baryo ug gilubong sa lapok ug debris ang mga dalan ug highway.

Dili mokubos sa 1,380 ka tawo ang namatay tungod sa mudslide, samtang kapin 5,500 ang missing.

Nakaluwas ang search teams sa Nepal og upat ka tawo sa miaging mga adlaw, lakip ang usa ka Chinese national nga nakuha gikan sa usa ka tunnel niadtong Sabado. Duha ka hydropower workers ang naluwas gikan sa laing tunnel niadtong Biyernes, samtang usa ka Nepali nga babaye ang nakuha gikan sa iyang nalubong nga balay niadtong Sabado.

Gipunting karon sa rescue operations ang mga hydropower station sa rehiyon, matod ni army spokesperson Raja Ram Basnet, diin nagtuo ang mga awtoridad nga posibleng aduna pay mga survivor.

Miingon ang Chinese officials niadtong Domingo nga 12 pa ka mga patayng lawas ang nakuha samtang nagpadayon ang pagpangita sa gatusan nga missing sa Tibet.

Wala magplano ang gobyerno og dagkong seremonya alang sa kataposang adlaw sa pagbangotan tungod kay nagpadayon pa ang pagpangita sa mga survivor.

“There are no government programmes organised as the rescue and search operation is still going on in the flood-hit areas,” matod ni Phanindra Paudel sa National Emergency Operation Centre (NEOC) ngadto sa Reuters.

Mibisita si President Ram Chandra Paudel sa mga lugar nga naapektuhan sa baha niadtong Lunes aron susihon ang kadaot nga nahimo sa kalamidad, matod sa iyang aide.

Nakaluwas usab ang security personnel sa district jail sa Nuwakot, usa sa duha ka pinakagrabeng naapektuhang distrito, og 923 ka mga piniriso pinaagi sa pagbalhin kanila ngadto sa mas taas nga building sa wala pa masudlan sa baha ang ilang ubos nga pasilidad, matod ni Prime Minister Balendra Shah sa usa ka social media post.

Nadakpan usab sa mga awtoridad ang 50 ka mga piniriso nga miguba sa bungbong ug mga ganghaan sa prisohan sa pagsugod sa baha ug nakaikyas og mga 100 metros, matod ni Shah. -Ato ni Bai