Nepal nag-awhag sa mga residente nga mobakwit human sa baha tungod sa landslide

Giawhag sa mga awtoridad sa Nepal niadtong Domingo ang mga residente sa mga baryo nga mobalhin sa mas luwas nga mga lugar human sa pagbaha sa usa ka suba sa sentral nga bahin sa nasod nga mianod sa daghang balay ug imprastruktura. Wala pay natala nga namatay o nasamdan sa maong insidente.

Usa ka dry landslide sa baryo sa Chumnubri sa Gorkha district, mga 100 kilometros (62 milya) sa kasadpan sa Kathmandu, ang nakababag sa Budhi Gandaki River, nga maoy hinungdan sa pagbaha sa ubos nga bahin sa suba, sumala sa mga awtoridad.

Ang Budhi Gandaki usa ka sanga sa Trishuli River, nga nahimutang sa ubos nga bahin sa suba gikan sa laing sanga diin ang pagkahugno sa glacier niadtong Agosto nagpahinabo og grabeng pagbaha nga mikalas sa kinabuhi sa 1,457 ka tawo, samtang liboan pa ang wala makit-i.

"We have asked villagers living along the river banks downstream to evacuate and remain safe," matod ni Dharmendra Kumar Mishra, ang labing taas nga opisyal sa administrasyon sa Gorkha district.

Matod ni Mishra, mga usa ka dosena ka balay ug duha ka suspension bridges ang naanod sa baha, samtang nadaot usab ang kampo sa usa ka hydroelectric project.

Matod ni Dharam Raj Uprety, pangulo sa National Disaster Risk Reduction and Management Authority, padayon ang pagsaka sa tubig sa suba nga nagdala og lapok ug hugaw, ug naanod usab ang usa ka highway bridge nga nagkonektar sa Gorkha ug sa kasikbit nga Dhading district.

Giluwas sa militar ang unom ka tawo gikan sa Jagat nga nameligro tungod sa landslide, sumala ni Prime Minister Balendra Shah sa usa ka social media post. Samtang, laing 18 ka trabahante sa hydroelectric project nga nadaot ang kampo ang nakalingkawas ngadto sa luwas nga lugar, matod ni Uprety.

Gipahimangnoan sa mga awtoridad sa pagdumala sa kalamidad ang mga residente nga nagpuyo duol sa suba sa mga distrito sa Gorkha, Tanahun, Chitwan, East Nawalparasi, ug West Nawalparasi bahin sa pagbaha.

"Please help ensure that people in at-risk areas are moved to safe locations in time and assist search and rescue operations as needed," matod sa National Disaster Risk Reduction and Management Authority sa usa ka social media post.

Matod sa mga opisyal, nakaabot na sa lugar ang mga rescue personnel sa militar ug kapulisan ug padayon usab nilang gibantayan ang sitwasyon gamit ang helicopter.

-Ato ni Bai