NCMH: Sayo nga pagpangayo og tabang, importante sa mental health treatment

MANILA — Gipasiugda sa National Center for Mental Health (NCMH) niadtong Huwebes ang importansya sa sayong pagpangayo og tabang sa mga propesyonal aron malikayan ang pagkalangan sa pagtambal sa mga problema sa mental health nga mahimong makaapekto sa adlaw-adlaw nga kalihokan ug kaayohan sa usa ka tawo.

Sa usa ka interview sa Bagong Pilipinas Ngayon, miingon si NCMH Medical Center Chief Dr. Noel Reyes nga kasagarang gibalewala sa mga Pilipino ang ilang gibating emosyonal nga kalisod kay nagtuo silang temporaryo lamang kini ug kaya ra nilang antoson. Matod niya, ang stigma ug mga pagtuo nga nakagamot sa kultura makapugong usab kanila sa pagpangayo dayon og tabang.

Gipasabot niya nga importanteng mailhan ang mga kausaban sa abilidad sa usa ka tawo sa pagtrabaho o pag-eskwela, pag-atiman sa kaugalingon, ug pagmintinar sa maayong relasyon sa ubang tawo aron mahibal-an kon kanus-a angay mokonsulta sa usa ka propesyonal.

"So iyang three levels of functioning na iyan ‘no, sa trabaho o sa eskuwelahan, sa kanyang pangsarili, sa social interactions ‘no, ay kapag naapektuhan na iyang functioning levels na iyan ay dapat na po talagang magpakonsulta (When these three areas of functioning –work or school, personal life, and social interactions– are already affected, it is important to seek professional consultation)," matod ni Reyes.

Lakip sa iyang gihisgotang mga timailhan nga dili angay balewalaon ang kalisod sa pagkatulog, pagpasagad sa personal nga kalimpyo, paglikay sa pakig-uban sa ubang tawo, ug pagkunhod sa performance sa trabaho o eskwelahan.

Matod ni Reyes, ang stigma nagpabiling dakong babag sa sayong pagpangayo og tabang, ilabina tungod sa mga pagtuo nga may kalabotan sa kaulaw, paglahutay sa kalisod, ug espirituwalidad.

Gipasidan-an usab niya nga ang sobra nga paggamit sa social media, cyberbullying, ug dugay nga pagduwa og online games mahimong makaapekto sa kalidad sa pagkatulog, makadugang sa kabalaka ug risgo sa depression, ug mahimong hinungdan sa pagpalayo sa ubang tawo.

Aron dasigon ang sayong pagpangayo og tabang, gitambagan ni Reyes ang mga ginikanan nga paminawon ang ilang mga anak nga nakasinati og emosyonal nga kalisod, imbes nga balewalaon ang ilang gibati o itandi ang ilang mga problema sa mga kasinatian sa mas tigulang nga henerasyon.

Gipasiugda niya ang importansya sa bukas nga komunikasyon ug regular nga pagpangumusta sa mga batan-on nga nag-atubang sa pressure bahin sa ilang identidad, pagsalig sa kaugalingon, ug pagdawat sa ilang mga kaedad.

Matod ni Reyes, mahimong makakuha og propesyonal nga serbisyo sa mental health pinaagi sa NCMH, nga naghatag og libreng outpatient consultations, tambal, laboratory tests, ug diagnostic procedures, ingon man zero balance billing alang sa mga pasyenteng na-admit sa ospital.

Aduna usab ang ospital og 24/7 crisis hotline ug emergency services.

"Seeking help is strength po, hindi po ito kahinaan ng loob ‘no (Seeking help is a sign of strength, not weakness), reaching out for support is really a courageous act," matod ni Reyes.

-Ato ni Bai