MMDA GM Torre nag-leave og usa ka bulan samtang giimbestigahan sa LTO

Nag-leave og usa ka bulan gikan sa iyang katungdanan si Metropolitan Manila Development Authority (MMDA) General Manager Nicolas Torre III sugod niadtong Martes, samtang nagpadayon ang imbestigasyon sa Land Transportation Office (LTO) sa dili awtorisadong paggamit og plaka sa sakyanan nga iyang gipanag-iya.

Sa usa ka pahayag niadtong Martes, miingon si MMDA Chair Don Artes nga boluntaryong nag-leave si Torre aron adunay igo nga panahon sa pagpamalandong.

“I have full trust and confidence in GM Torre as far as his work is concerned. The MMDA respects Gen. Torre’s decision and wishes him well during his period of leave,” matod ni Artes.

Gidugang niya nga gitugyan sa MMDA ngadto sa LTO ang pag-imbestigar sa kaso.

“No official, regardless of position or rank, is exempt from traffic laws and policies enforced to maintain order on major thoroughfares. The agency remains fully committed to the strict enforcement of traffic rules and regulations, public accountability, and continuous delivery of public service mandates,” matod niya.

Gipasalig usab ni Artes nga dili maapektuhan ang operasyon sa MMDA bisan nag-leave si Torre.

Nahitabo ang pag-leave human gibawi sa LTO ang driver’s license sa drayber sa sports utility vehicle (SUV) nga gipanag-iya ni Torre tungod sa sayop nga paggamit og plaka.

Nagsugod ang kaso sa usa ka video nga nagpakita sa SUV nga adunay MMDA markings, lakip ang body number, siren, ug blinker. Apan sa pag-verify sa LTO, nasuta nga ang plaka nga nakabit sa sakyanan dili tugma sa ilang records ug nakarehistro ang SUV isip pribadong sakyanan.

Nagpagawas ang LTO og Show Cause Order (SCO) batok sa drayber niadtong Agosto 28, ug laing SCO batok sa registered owner niadtong Agosto 29 human migawas atol sa imbestigasyon ang ikaduhang insidente nga nalambigit ang maong sakyanan.

Nagpabilin nga gi-impound ang SUV sa LTO Central Office ug gimando nga tangtangon ang MMDA markings, siren, ug blinker niini.

Una nang gikompirma ni Artes nga miangkon si Torre nga iya ang sakyanan nga nakit-an sa video nga nag-agi sa EDSA Busway. -Ato ni Bai