Misaka sa kapin 1,400 ang namatay sa linog sa Venezuela samtang gipakusog ang rescue operations

Misaka sa kapin 1,400 ang gidaghanon sa namatay tungod sa makusog nga duha ka linog nga miigo sa Venezuela, samtang nag-abot ang mga foreign rescue team ug gipadayon sa mga awtoridad ang pagpangita sa mga naluwas sa labing grabeng naapektuhang mga lugar sa baybayon.

Ang bag-ong ihap sa mga namatay migawas samtang nagpadayon ang mga rescuer sa pagpangita sa La Guaira ug ubang bahin sa Caracas. Sulod na sa pipila ka adlaw, nagtinabangay ang mga pamilya ug mga boluntaryo sa pagpangita ug pagkuha sa mga naluwas ug mga patay gikan sa mga nagun-ob nga mga bilding. Matod nila, kulang ang mga bug-at nga kagamitan ug limitado ang presensya sa mga awtoridad sa pipila ka lugar.

Miingon ang mga opisyal nga kapin 1,600 ka foreign rescuer na ang miabot sa nasud ug adunay dugang pang mga team nga padulong. Kabahin kini sa nagkadako nga internasyonal nga responde human sa duha ka linog nga miigo niadtong Miyerkules ug misangpot sa gatusan ka aftershock.

Sa Caraballeda, usa sa labing grabeng naapektuhang lugar sa La Guaira, naglupad ang mga helicopter sa Estados Unidos aron magdala og mga rescue team ngadto sa usa ka temporaryong landing zone, sumala sa mga saksi sa Reuters. Human sa pagpaubos sa mga rescuer, milupad dayon pagbalik ang mga helicopter.

Usa sa mga boluntaryong mitabang mao si Alejandro Serrano, 33 anyos ug usa ka industrial engineer, nga mibyahe gikan sa San Cristobal sa kasadpang Venezuela aron pangitaon ang iyang 24-anyos nga igsoong babaye nga si Ana Serrano. Nagpuyo kini sa Bahía Mar building sa Caraballeda nga nalumpag sa linog.

Miingon si Serrano nga nangita siya sa iyang igsoon sa Perez Carreno Hospital sa Caracas niadtong Huwebes sa gabii apan wala niya kini makita. Iyang gihatag ang impormasyon ug adres sa iyang igsoon ngadto sa mga rescue team gikan sa Argentina ug El Salvador.

“Nagalaom ko nga dili nila siya makit-an sa ilawom sa mga nagun-ob,” matod niya, nga nagpasabot nga naglaom siyang buhi pa ang iyang igsoon. “Apan kinahanglan gyud nakong makit-an siya.”

Nagtulog sa kadalanan

Miingon ang mga residente nga dili patas ang rescue response sa ubang lugar, bisan pa nga nagpadayon ang paggamit og bug-at nga makinarya sa pipila ka bahin sa Caraballeda ug Los Corales niadtong Sabado.

Sa gamayng lugar sa Los Corales nga nailhang Valle del Pino, miingon si Beisy Rivas, 60, nga lima o unom ka balay sa ilang komunidad ang nagpabiling nagtindog apan naguba.

“Sukad sa gabii nga nahitabo ang mga linog, halos tanan namong silingan natulog na lang sa dalan tungod sa nagpadayon nga mga aftershock,” matod niya. “Dili mawala ang akong kabalaka tungod sa mga namatay ug sa mga pamilyang nawad-an og mahal sa kinabuhi.”

Sa duol nga lugar, miingon si Yendri Santana nga adunay mga balay sa ilang komunidad nga adunay mga liki sa mga bungbong, apan walay namatay didto. Samtang naglingkod sila ni Rivas sa daplin sa dalan human makadawat og food donations, iyang giingon nga naguba ang gamayng balay sa iyang igsoon apan naluwas kini.

“Sakit kaayo tan-awon nga naningkamot ang mga tawo sa tibuok nilang kinabuhi unya mawala lang ang tanan,” matod niya.

Nagpadayon ang mga awtoridad sa pagpugong sa pagsulod sa La Guaira ug nagpabilin ang mga checkpoint sa nag-unang dalan gikan sa Caracas, tungod kay nakapahinay sa paglihok sa mga emergency vehicle ang daghang sakyanan. Ang mga sibilyan nga dili sakop sa opisyal nga rescue team kinahanglan adunay kredensiyal aron makatabok sa mga checkpoint.

Hinay-hinay usab nga nibalik ang suplay sa kuryente sa rehiyon. Dugay nang nag-atubang og mga problema ang power grid sa Venezuela tungod sa kakulang sa pamuhunan ug economic sanctions, nga maoy hinungdan sa dugayng brownout sa ubang mga lugar.

55,000 ang wala gihapon makit-i

Bisan pa nga miingon ang gobyerno nga gatusan ang wala gihapon makit-i o natanggong, kapin 55,000 ka tawo ang gilista nga wala pa makit-i sa usa ka website nga gipaluyohan sa oposisyon.

Gibanabana sa U.S. Geological Survey nga posibleng molapas sa 10,000 ang mahimong mamatay tungod sa magnitude 7.2 ug 7.5 nga mga linog. Kung mahitabo kini, mahimong maapil kini sa labing makamatay nga mga linog sa Latin America sa miaging siglo.

Posible usab nga adunay epekto sa politika ang maong trahedya alang kang interim President Delcy Rodriguez, nga nagpakita sa iyang kaugalingon isip simbolo sa kausaban bisan pa nga kaniadto siyang bise presidente ni Nicolas Maduro, nga gipapahawa ug gidakop sa Estados Unidos niadtong Enero.

Nag-ampo usab si Pope Leo sa Roma niadtong Sabado alang sa mga biktima, ilang mga pamilya, ug sa mga nagtabang sa rescue operations. Naglaom usab siya nga magpadayon ang suporta sa kalibotan alang sa Venezuela.

Nagpadala usab ang Estados Unidos og tabang sa Venezuela human sa mga linog. Miingon ang usa ka senior U.S. administration official nga gilauman nga ipahibalo sulod sa usa o duha ka adlaw ang usa ka funding package nga nagkantidad og gatusan ka milyon ka dolyar, dugang pa sa $150 milyon nga naunang gisaad sa administrasyon ni Trump.

Miingon usab ang usa ka opisyal sa White House sa Reuters nga nakahatag og kabalaka sa pipila ka senior officials sa Washington ang bag-ong panawagan ni Venezuelan opposition leader Maria Corina Machado alang sa tabang sa Estados Unidos aron makabalik sa Venezuela. Matod nila, sayo pa kaayo alang sa maong lakang human sa nahitabo nga trahedya.

-Ato ni Bai