top of page
Bai (150 x 150 px) (100 x 100 px).png

Mga opisyal sa panglawas, nagsusi sa unang kaso sa Ebola sa Nigeria

Nagdalidali ang mga opisyal sa panglawas sa tibuok Africa sa pagtino kon giunsa pagkatakdan ang unang pasyente sa Ebola sa Nigeria sulod sa kapin sa usa ka dekada, taliwala sa kabalaka nga mahimong mokaylap pa ang outbreak human kini makaabot sa ikaupat nga nasod sa Africa.

Robbie Corey-Boulet and Ammu Kannampilly, Reuters; Gihubad ni Herli Mae Virador, Ato ni Bai

October 24, 2026 at 11:04:27 AM

Hulagway sa mga gagmay nga ambulansya nga nakaparking sa gawas sa usa ka bilding sa Nigeria.

Nakaparking ang mga ambulansya sa gawas sa headquarters sa Federal Ministry of Health sa Abuja, Nigeria, Oktubre 21, 2026. Reuters/Marvellous Durowaiye

Marvellous Durowaiye / Reuters

Nagdalidali ang mga opisyal sa panglawas sa tibuok Africa sa pagtino kon giunsa pagkatakdan ang unang pasyente sa Ebola sa Nigeria sulod sa kapin sa usa ka dekada, taliwala sa kabalaka nga mahimong mokaylap pa ang outbreak human kini makaabot sa ikaupat nga nasod sa Africa.


Miingon ang gobyerno sa Switzerland niadtong Biyernes nga ang pasyente sa Nigeria, usa ka babayeng natawo sa Uganda ug asawa sa usa ka Swiss diplomat nga nakabase sa Abuja, wala mobiyahe ngadto sa Democratic Republic of Congo, diin unang natikdan ang outbreak sa tungatunga sa Mayo sa wala pa kini mikaylap sa Uganda, Kenya, ug karon sa Nigeria.


Matod sa Swiss Federal Department of Foreign Affairs, gituohang natakdan sa Ebola ang babaye samtang nagbiyahe uban sa iyang bana sa Uganda, nga gideklarar sa World Health Organization (WHO) nga Ebola-free niadtong Agosto.


Narekord na karon ang outbreak sa upat ka nasod sa eastern, central, ug western Africa, nga naghimo niini nga Ebola outbreak nga adunay pinakahalapad nga pagkaylap sa nagkalainlaing lugar sa kontinente hangtod karon.


Ang posibilidad nga natakdan ang pasyente sa Nigeria samtang didto sa Uganda, diin matod sa mga opisyal nagpahulay siya sulod sa duha ka semana sa wala pa mibalik sa Abuja, nakapadugang sa kabalaka nga adunay wala pa matikdi nga pagpasa sa virus sa usa ka nasod diin ang outbreak daw nakontrol na.


Miingon ang mga awtoridad sa Uganda nga ang babaye nakaadto sa eastern Congo sa wala pa miagi sa Uganda, apan matod sa WHO ug sa pangunang ahensiya sa panglawas sa Africa, wala pa makumpirma ang maong impormasyon.


Miingon ang WHO nga nagpadayon ang mga imbestigasyon aron matino ang tinubdan sa impeksiyon. Gisulayan sa mga awtoridad sa Nigeria ang babaye alang sa Ebola 13 ka adlaw human siya nagsugod og sakit sa Abuja.


MGA PASYENTE SA NIGERIA UG KENYA, MIBIYA SA UGANDA SA PAREHONG ADLAW


Usa sa mga posibilidad nga giimbestigahan mao nga basin natakdan ang pasyente sa Nigeria gikan sa unang kumpirmadong pasyente sa Ebola sa Kenya, nga milupad usab gikan sa Entebbe airport sa Uganda sa parehas nga adlaw sa unang bahin sa Oktubre.


Namatay ang pasyente sa Kenya duha ka adlaw ang milabay sa usa ka ospital sa Nairobi.


Nagpahimangno ang mga eksperto batok sa paghimog konklusyon nga wala pay lig-ong ebidensiya, tungod kay ang Ebola mokaylap pinaagi sa direktang kontak sa mga likido sa lawas sa natakdang tawo o sa mga butang nga nakontamina sa virus.


"I think that is very speculative unless there is evidence of sharing the same space in a manner that could explain that," matod ni Marion Koopmans, usa ka Dutch virologist ug miyembro sa Ebola emergency committee sa WHO.


"Random presence at the same location, a large airport, is not a supported epidemiological link by any standard of what we currently know."


Miingon si WHO Kenya representative Neema Rusibamayila Kimambo nga posibleng nagkataon lamang nga ang duha ka pasyente mibiya sa Entebbe airport niadtong Oktubre 3.


"Among the contacts that we even have here in country, even all those who are on the plane with this (Kenyan) patient and all airport staff, we have not had any infections in that group," matod ni Kimambo.


UGANDA, WALAY NAREKORD NGA KASO SA EBOLA SUKAD HUNYO


Nagtala ang Uganda og 20 ka kaso sa Ebola niadtong Mayo ug Hunyo, diin kadaghanan sa mga kaso gikan sa Congo, apan wala na kini makamatikod og bag-ong kaso sukad Hunyo.


Gisultihan ni Ugandan government spokesperson Alan Kasujja ang Reuters niadtong Huwebes nga walay kaso sa Ebola sa Uganda ug ipahibalo nila sa publiko kon adunay ingon niini nga impormasyon. Wala siya makontak alang sa komento niadtong Biyernes.


Hapit 10,000 ka tawo ang natakdan sa Ebola sa Congo, samtang kapin sa 4,600 ang namatay. Ang sakit mahimong hinungdan sa hilanat, pagsuka, kalibanga, ug sa grabeng mga kaso, pagdugo sa sulod ug gawas sa lawas. Ang mga tawo lamang nga adunay sintomas ang makapasa sa virus.


Wala pay aprubadong tambal o bakuna alang sa talagsaong klase sa Ebola virus nga hinungdan sa kasamtangang outbreak.


-Robbie Corey-Boulet and Ammu Kannampilly/Reuters; Gihubad ni Herli Mae Virador, Ato ni Bai

bottom of page