Mga Nasod Giawhag sa Climate Summit nga Pakusgan ang Pagbatok sa Global Warming

Giawhag ang mga nasod nga dinaliang pakusgan ang ilang mga paningkamot aron dili molapas sa 1.5 degrees Celsius (2.7 degrees Fahrenheit) ang pagsaka sa temperatura sa kalibotan ug maminusan ang epekto sa grabeng mga kahimtang sa panahon, sumala sa pahayag gikan sa usa ka komperensya sa pagpangandam alang sa COP31 summit sa United Nations (UN).

Gipahayag sa tigom sa mga ministro nga gihimo sa Fiji ug Tuvalu niadtong Martes nga "deep, rapid and sustained emissions reductions are required to minimise the magnitude and duration of overshoot" sa gitakdang limitasyon sa temperatura.

"As global temperature increases approach 1.5C and we face strong El Nino conditions, we reiterate that every fraction of a degree of warming accelerates the impacts of climate change and increases the risk of irreversible loss and damage for climate vulnerable communities," matod sa pahayag.

Nag-atubang ang pipila ka nasod sa Pasipiko sa hulga sa ilang paglungtad tungod sa pagsaka sa lebel sa dagat nga gipahinabo sa pagbag-o sa klima. Sumala sa mga tigdukiduki sa NASA, misaka og mga 15 sentimetro (6 pulgada) ang lebel sa dagat sa Tuvalu sulod sa tulo ka dekada hangtod 2023, nga doble sa kasagarang pagsaka sa tibuok kalibotan.

Ubos sa 2015 Paris Agreement, misaad ang mga gobyerno nga limitahan ang pag-init sa kalibotan ngadto sa 1.5 degrees Celsius ibabaw sa temperatura niadtong 1850 hangtod 1900, sa wala pa ang panahon sa industriyalisasyon. Apan, mipahimangno ang ahensiya sa UN alang sa kinaiyahan niaging bulan nga mahimong molapas ang kalibotan niini nga limitasyon "within a few years".

Gipamatud-an usab sa komperensya sa pagpangandam alang sa COP31 ang kamahinungdanon sa pagpadayon sa pagkasoberano sa mga nasod ug sa ilang katungod nga magpabilin ang ilang mga utlanan sa kadagatan ubos sa internasyonal nga balaod, bisan pa sa pagsaka sa lebel sa dagat nga mahimong mousab sa mga baybayon sa Pasipiko.

Ang mga tigom sa pagpangandam alang sa COP31 kasagarang gitambongan sa mga negosyador sa klima ug mga eksperto aron hisgotan ang teknikal nga mga isyu sa dili pa ang pangunang komperensya sa United Nations nga himuon sa Turkey karong Nobyembre.

Nagtinabangay ang Australia ug ang mga kaabag niini sa Pasipiko pinaagi sa COP31 Pacific Partnership aron masiguro nga madungog ang tingog ug mga solusyon sa mga nasod sa Pasipiko sa tibuok kalibotang paglihok batok sa pagbag-o sa klima. Tumong usab niini nga mapalig-on ang ilang relasyon sa rehiyon sa dili pa ang pangunang summit. -Ato ni Bai