Mga nakamaskarang Israeli, nagsunog og mga kahoy nga olibo; journalist nasamdan sa West Bank
Gisunog sa dosena ka militanteng Israeli settler nga nagsul-ob og itom ug nagtabon sa ilang mga nawong ang mga kahoy nga olibo ug gibato ang mga Palestinian atol sa organisadong pag-atake sa tinuig nga pagpamupo og olibo sa usa ka baryo sa West Bank niadtong Biyernes. Labing menos duha ka tawo ang nasamdan, lakip ang usa ka journalist.
Ato ni Bai
October 17, 2026 at 2:18:33 AM

Gibubuan og tubig sa usa ka bombero ang nasunog nga sakyanan human giatake sa mga militanteng Israeli settler ang usa ka grupo sa mga Palestinian nga nangharvest og olibo duol sa Turmus Ayya sa West Bank nga giokupar sa Israel, Oktubre 16, 2026.
Ammar Awad / Reuters
Gisunog sa dosena ka militanteng Israeli settler nga nagsul-ob og itom ug nagtabon sa ilang mga nawong ang mga kahoy nga olibo ug gibato ang mga Palestinian atol sa organisadong pag-atake sa tinuig nga pagpamupo og olibo sa usa ka baryo sa West Bank niadtong Biyernes. Labing menos duha ka tawo ang nasamdan, lakip ang usa ka journalist.
Sumala sa mga saksi sa Reuters, mga 80 ka settler, nga ang pipila nagdalag mga sudlanan sa gas, ang nanaog gikan sa bungtod ibabaw sa umahan sa mga kahoy nga olibo diin nagtigom ang mga residente sa Abu Falah aron mamupo sa mga hinog nga bunga. Ang tinuig nga pagpamupo og olibo usa ka importante nga tradisyon sa kinabuhi sa mga Palestinian.
Mipwesto ang mga settler atubangan sa mga han-ay sa kahoy nga olibo sa bakilid nga umahan. Ang pipila kanila migamit og tirador aron ipanglabay ang mga bato ngadto sa mga Palestinian nga residente, nga nanaog sa ubos nga bahin sa bungtod sa wala pa mamunit og mga bato ug ibato kini balik aron depensahan ang ilang kaugalingon.
"The settlers want to attack us and force us from our homes," matod ni Moutaz Abdelhadi, 42 anyos, usa ka mag-uuma nga nakasaksi sa pag-atake sa Abu Falah.
Samtang nagpadayon ang pag-atake, labing menos duha ka jeep sa militar sa Israel ang kusog nga miagi sa lugar, nga nakapabugwak og abog samtang naglikay ang mga residente sa ilang agianan.
Nagpadayon ang pag-atake bisan human sa pag-abot sa militar, diin nagpabuto og tear gas ang mga sundalo sa Israel padulong sa mga Palestinian nga milikay sa mga jeep. Nadungog usab ang mga buto sa armas sa lugar, ug usa ka photographer sa Reuters ang nakakita sa labing menos usa ka armadong settler nga nagpabuto og pusil.
Sa usa ka pahayag, miingon ang militar sa Israel nga nagpabuto og warning shots ang mga sundalo ug border police human sila gipadala sa lugar. Sa usa ka higayon, nagpabuto usab sila padulong sa usa ka tawo nga ilang gituohang naghatag og hulga.
"Attempts to incite friction between populations undermine security in the area," matod sa militar. "Attacks and violence against innocent civilians are grave and unacceptable," dugang niini.
JOURNALIST SA WASHINGTON POST, NASAMDAN
Miingon ang mga Palestinian medic nga duha ka tawo ang nasamdan ug gidala sa mga ospital sa lugar sa Ramallah. Usa kanila si Heidi Levine, usa ka photojournalist sa Washington Post. Sa video sa pag-atake, makita si Levine nga naghigda nga patakilid sa yutang agianan samtang gitabonan sa iyang mga kamot ang iyang nawong ug gilibotan siya sa labing menos tulo ka settler.
Samtang naa sa higdaanan sa ospital, miingon si Levine, nga anaa na sa lig-ong kondisyon: "I was attacked, pushed to the ground. Luckily I had my flak jacket and helmet, otherwise I probably wouldn't even be here, because they just kept kicking me and kicking me."
Matod ni Levine, nahunong ang pag-atake dihang nangilabot ang iyang mga Palestinian nga kauban. Human niini, gidali siya sa mga medic sakay sa ambulansiya ngadto sa usa ka klinika sa Abu Falah ug dayon gidala sa ospital sa Ramallah.
Nagkurog ang iyang tingog samtang nagsulti, ug adunay mga bendahe ang iyang wala nga kamot.
Sa usa ka pahayag, nanawagan si Matt Murray, executive editor sa Washington Post, nga imbestigahan ang insidente.
"This morning, a Washington Post photographer, Heidi Levine, was attacked by Israeli settlers while reporting in the West Bank,” matod ni Murray.
"She was wearing visible markings clearly identifying her as a journalist. While we are relieved that Heidi has received medical care and is safe, we are outraged by this unwarranted attack on a journalist doing her job and urge a thorough investigation and follow-through from authorities."
PAGPANGLUPIG SA MGA ISRAELI SETTLER SA WEST BANK, MISAKA
Misaka ang mga insidente sa pagpanglupig sa mga Israeli settler batok sa mga Palestinian sa giokupar nga West Bank, diin labing menos 170 ka pag-atake ang natala sukad sa Setyembre 27, sa panahon nga nagsugod ang tinuig nga pagpamupo og olibo, sumala sa Yesh Din, usa ka Israeli nga grupo nga nagmonitor sa mga settlement.
Mas nangahas ang mga settler tungod sa right-wing nga gobyerno ni Prime Minister Benjamin Netanyahu, nga nagdumala sa paspas nga pagpalapad sa mga settlement ug gagmayng outpost sa tibuok West Bank.
Gikritikar ni Netanyahu ang pagpanglupig apan gamay ra ang iyang nahimong lakang aron mapugngan ang mga insidente nga gikondena sa internasyonal nga komunidad ug nakapadasig sa mga plano sa pagpatuman og silot gikan sa dugay nang mga kaalyado sa Israel, lakip ang Britain.
Gipuy-an ang West Bank sa mga 500,000 ka settler ug labing menos 3 milyon ka Palestinian. Giisip sa mga ahensiya sa UN ug kadaghanan sa mga nasod nga ilegal ang mga settlement ubos sa internasyonal nga balaod bahin sa pag-okupar sa militar. Apan wala kini dawata sa Israel, nga nagtan-aw sa teritoryo isip lugar nga gilalisan imbes nga giokupar.
Ang pag-atake sa Abu Falah nahitabo human sa susamang insidente sa lugar sa baryo sa Turmus Ayya niadtong Biyernes sa buntag, diin gisunog sa mga settler ang tulo ka sakyanan human nila giatake ang grupo sa mga mag-uuma nga namupo og olibo. Wala dayon motubag ang militar sa hangyo nga maghatag og komento.
Matod ni Salah Abu Niswa, nga nakasaksi sa pag-atake sa Turmus Ayya, ang mga settler "snuck up like thieves, they caught someone by himself and began to beat him."
-Ato ni Bai
%20(100%20x%20100%20px).png)