Mga Glacier sa Switzerland Nawad-an og Labaw 5% nga Yelo Tungod sa Grabeng Kainit

Paspas nga nagkagamay ang mga glacier sa Switzerland human kini nakaagi sa usa sa labing grabe nga tuig sa pagkawala sa yelo atol sa talagsaong grabeng kainit sa Europe.

Nawad-an og labaw sa 5% sa ilang yelo ang mga glacier sa Switzerland niadtong 2026, sumala sa taho sa Swiss Glacier Monitoring Network (GLAMOS) ug Swiss Commission for Cryosphere Observation of the Swiss Academy of Sciences niadtong Huwebes.

Gipakita sa mga resulta ang nagkapaspas nga pagkagamay sa mga glacier samtang nagkaanam na og kasagarang mahitabo ang mga tuig nga grabe ang pagkatunaw sa yelo. Sulod sa miaging lima ka tuig, nawala ang hapit ikalima nga bahin sa yelo sa mga glacier sa Switzerland, nga mahimong hulga sa umaabot nga suplay sa tubig ug nagpatunghag pangutana kon hangtod kanus-a mabuhi ang dagkong natad sa yelo sa Europe, sumala sa taho.

“Now we are in this new world, in this future, where glaciers are just melting away,” matod ni Matthias Huss, director sa GLAMOS.

Matod ni Huss, ang kombinasyon sa tingtugnaw nga kulang kaayo ang niyebe ug talagsaong taas nga temperatura panahon sa ting-init maoy misangpot sa gitawag niyang “enormous” nga pagkatunaw karong tuiga.

USA KA MAKAPABALAKA KAAYONG KAHIMTANG

“We are seeing extreme years almost every year now and this is really a worrying situation,” matod ni Huss.

Bisan pa niini, wala pa makaabot sa labing taas nga rekord niadtong 2022 ang gidaghanon sa nawalang yelo, sa dihang mitabon sa niyebe ang mga panganod sa abog gikan sa North Africa ug nakapaspas sa pagkatunaw niini, matod ni Huss.

Nasinati sa Aletsch Glacier, ang kinadak-ang glacier sa Switzerland, ang pinakadakong pagkatunaw nga natala niini karong tuiga, samtang nawad-an og kapin sa upat ka metros (13 feet) sa kasagarang gibag-on ang Glacier de Tsanfleuron. Matod ni Huss, dili kini mahunahuna nga mahitabo pipila ka tuig ang milabay.

Sa kinatibuk-an, gibanabana sa mga siyentista nga nawad-an og mga 2.2 trilyon ka litro nga tubig ang mga glacier sa Switzerland gikan Hulyo hangtod Setyembre lamang, katumbas sa kapin upat ka pilo sa tinuig nga konsumo sa mainom nga tubig sa mga panimalay sa Switzerland.

Aduna kini usa ka maayong epekto: ang tubig gikan sa natunaw nga mga glacier makatabang sa pagpagaan sa kakulang sa tubig panahon sa ting-init.

Apan samtang nagkagamay ang mga lugar nga natabonan sa yelo ug ang mga glacier mismo, nagkagamay usab kini nga kaayohan, matod ni Huss.

“It’s not that we’re surprised because we know how fast the glaciers are melting, but to see the colours of the mountains where there is no snow left, there are just these rocks,” matod ni Huss. “It makes me sad.” -Ato ni Bai