top of page
Bai (150 x 150 px) (100 x 100 px).png

Mambabalaod sa Australia nga si Helen Haines Nawad-an sa Duha ka Tiil Human sa Pag-atake

Naputlan sa duha ka tiil ang Australian nga mambabalaod nga si Helen Haines human siya tinuyong gibanggaan og sakyanan sa gawas sa iyang opisina sa distrito, matod sa iyang bana niadtong Miyerkules, samtang miatubang sa korte ang lalaking giakusahan sa pag-atake.

Renju Jose / Reuters; Gihubad ni Alex Destor, Ato ni Bai

October 22, 2026 at 8:12:24 AM

Hulagway ni Australian lawmaker Helen Haines.

Nagpakita og reaksyon si Helen Haines, independent nga representante sa Indi, atol sa iyang pagpamulong sa National Press Club sa Canberra, Australia, Pebrero 14, 2025.

AAP / Lukas Coch/ pinaagi sa Reuters

Naputlan sa duha ka tiil ang Australian nga mambabalaod nga si Helen Haines human siya tinuyong gibanggaan og sakyanan sa gawas sa iyang opisina sa distrito, matod sa iyang bana niadtong Miyerkules, samtang miatubang sa korte ang lalaking giakusahan sa pag-atake.


Giputol sa mga doktor ang wala nga tiil ni Haines human siya kaduha gibanggaan sa sakyanan sa giingong suspek sa Wangaratta, amihanan-sidlakan sa Melbourne, niadtong Lunes, matod sa iyang bana nga si Phil Haines.


Sulod sa pipila ka adlaw, naningkamot ang mga doktor nga maluwas ang iyang tuo nga tiil apan wala kini molampos, matod niya sa press conference sa Melbourne.


"The good news in all this is Helen is alive and she's stable. That is the most important thing for our family," matod niya.


Giakusahan sa tulo ka kalapasan si Brendan Nugent, 43, residente sa lungsod sa Tarrawingee nga sakop sa distrito ni Haines. Kini mao ang dangerous driving causing serious injury, intentionally causing serious injury, ug causing harm to a public official.


Gipasakaan usab si Nugent og dugang kaso nga may kalabotan sa pagpananom ug paghupot og cannabis, sumala sa mga dokumento sa korte.


Gipugngan sa mga tawo nga anaa sa lugar ang suspek sa wala pa siya gidakop sa kapulisan.


Nagpabiling kritikal ang kahimtang ni Haines, usa ka independent nga mambabalaod nga nagpasiugda sa mga isyu sama sa climate change ug pagpabalay sa mga residente sa mga probinsiya.


Padayon pang giimbestigahan sa kapulisan ang motibo sa talagsaong pag-atake batok sa usa ka napiling opisyal.


SUSPEK DUNAY MGA PROBLEMA SA MENTAL HEALTH


Atol sa mubo nga pag-atubang sa korte niadtong Miyerkules, gibutyag sa abogado sa akusado nga ang iyang kliyente adunay talagsaong sakit sa nervous system nga gitawag og idiopathic transverse myelitis ug gitambalan usab tungod sa concussion, sumala sa Australian Broadcasting Corporation. Gisultihan usab sa abogado ang mahistrado nga adunay mga problema sa mental health ang iyang kliyente ug kini ang unang higayon nga siya napriso.


Walay gihimong hangyo alang sa piyansa, ug gibalhin ang pagpadayon sa kaso ngadto sa Pebrero 4.


Apil ang mga kapulisan sa anti-terrorism sa mga ahensiyang nag-imbestigar sa insidente. Bisan og giingon sa kapulisan nga "targeted" ang pag-atake, nagtuo sila nga kini usa lamang ka nahimulag nga insidente.


Matod ni Commissioner Krissy Barrett, walay nadawat nga impormasyon nga nagpakita og hulga batok kang Haines, ug wala usab makadawat og pasidaan ang Australian Federal Police bahin sa posibleng umaabot nga peligro gikan sa giingong suspek.


"What I can say is we didn't have any specific intelligence that would have indicated something as atrocious as happened on Monday afternoon," matod niya.


Matod sa kapulisan sa Victoria, wala silay nakitang ebidensiya nga adunay direktang kontak kaniadto si Haines ug ang akusado, samtang wala pa gihapon matino ang motibo sa pag-atake.


"Motivation is one of these things that we absolutely need to explore. His motivation for this, what we allege is a deliberate attack, is very much a centrepiece of the investigation," matod ni Victoria Police Chief Mike Bush.


Wala mokomentaryo si Bush bahin sa mental health sa lalaki tungod kay gidungog na sa korte ang kaso.


Nagtrabaho kaniadto si Haines sa nursing, midwifery, ug akademya sa wala pa siya napili sa parlamento niadtong 2019 isip representante sa rural nga distrito sa Indi. Napadayon niya ang iyang posisyon sa mga eleksiyon niadtong 2022 ug 2025.


Talagsa ra ang mapintas nga pag-atake batok sa mga politiko sa Australia, diin kasagarang makita ang mga federal nga mambabalaod, mga lider sa estado, ug bisan mga prime minister nga mamalit, moinom og kape, o motambong sa mga kalihokan sa komunidad nga gamay ra ang seguridad.


Apan misaka ang kabalaka bahin sa kaluwasan sa mga politiko sa miaging mga tuig tungod sa nagkagrabeng pagkabahinbahin sa politika, mga pag-abuso sa internet, ug mga hulga batok sa mga napiling opisyal. Tungod niini, adunay mga panawagan nga palig-onon ang ilang seguridad samtang magpabilin silang sayon maduolan sa publiko, nga dugay nang kinaiya sa politika sa Australia.



bottom of page