Leptospirosis epidemic gideklarar sa Manila

Nagdeklarar ang Manila City Government niadtong Lunes og “leptospirosis epidemic” human milapas sa epidemiological threshold ang gidaghanon sa mga bag-ong natala nga kaso.

Sa usa ka social media post, miingon ang Manila Public Information Office (MPIO) nga gitaho ni Officer-in-Charge City Health Officer Dr. Grace Padilla kang Manila Mayor Francisco “Isko” Moreno Domagoso nga nakaabot na sa “epidemic condition” ang pagkaylap sa leptospirosis.

Gipakita sa datos sa Manila Health Department (MHD) nga misaka ang infection rate gikan sa 1.27 porsyento sa miaging semana ngadto sa 3.48 porsyento, nga nagpakita sa paspas nga pagsaka sa mga kaso sulod lamang sa mubo nga panahon.

Midugang si Padilla nga puno na ang pipila ka district hospitals sa city government tungod sa padayong pagdaghan sa mga pasyente, lakip ang Ospital ng Maynila, Sta. Ana Hospital ug Justice Jose Abad Santos General Hospital.

Human sa report sa MHD, gimando ni Domagoso sa mga opisina sa city government nga pakusgon ang kampanya batok sa leptospirosis, lakip ang pagpahibalo sa publiko ug libreng pag-apod-apod og doxycycline capsules sa 44 ka health centers ug pito ka district hospitals.

Miingon si Domagoso nga padayon nga nakig-abot ang city government, pinaagi sa MHD ug mga opisyal sa barangay, ngadto sa mga residente. Iapod-apod usab ang doxycycline ngadto sa mga naapektuhan sa bag-ohay nga pagbaha. -Ato ni Bai