Lawyer nangayo og ‘accountability’ human maabsuwelto ang kanhi deputy sa pagpatay sa Black airman

Misaad ni civil rights attorney Ben Crump niadtong Biyernes nga "seek accountability" sa pagkamatay ni US Air Force airman Roger Fortson sa pagpamusil niadtong 2024, human giabsuwelto sa jury sa Florida si kanhi sheriff's deputy Eddie Duran sa manslaughter.

Matod sa defense attorney ni Duran, "doing his job" lamang ang kanhi deputy niadtong adlawa ug buhi pa unta si Fortson kon wala siya nagdala og armas sa wala pa niya ablihi ang iyang pultahan.

Gihimo nila ang maong mga pahayag usa ka adlaw human nagpagawas ang mga juror sa upat ka adlaw nga trial og not guilty verdict human sa mga duha ka oras nga deliberations.

Gipusil ug napatay ni Duran, usa ka deputy sa Okaloosa County Sheriff's Office, ang 23-anyos nga si Fortson pipila ka gutlo human niya ablihi ang pultahan sa iyang apartment niadtong Mayo 3, 2024.

Sa usa ka pahayag, giawhag sa opisina ni State Attorney Ginger Bowden Madden ang publiko nga motubag "peacefully" sa verdict.

"We understand that this verdict will cause pain, anger, or disappointment for many people, particularly some members of the community who view Senior Airman Fortson's death within a context of encounters nationally involving law enforcement," matod sa pahayag.

Nahimong national news niadtong panahona ang pagpamusil kang Fortson, nga nakapukaw og debate bahin sa race ug paggamit sa puwersa sa kapulisan, samtang daghang kontrobersyal nga pagpamusil sa mga pulis sa Black men ang nabutyag tungod sa pag-uswag sa video technology sa bag-ohay nga mga tuig. Gitangtang ni Okaloosa Sheriff Eric Aden si Duran sa trabaho usa ka bulan ang milabay, ug matod niya, dili makatarunganon ang paggamit sa deadly force.

Gipakita sa video gikan sa body camera sa deputy nga giablihan ni Fortson ang iyang pultahan samtang nagkupot og handgun sa iyang kilid nga nakatudlo paingon sa salog. Diha-diha dayong mipusil ang deputy sa makadaghang higayon gikan sa duol nga distansiya. Sa ulahi, namatay si Fortson sa ospital.

Nakakuha si Crump og multimillion-dollar settlements alang sa mga pamilya sa ubang Black people nga gipatay sa kapulisan, lakip ang $27 milyon gikan sa city of Minneapolis alang sa 2020 murder ni George Floyd ug $12 milyon gikan sa city of Louisville alang sa pagkamatay ni Breonna Taylor sa mao gihapong tuig.

Nagsumite siya og federal civil rights case batok kang Duran, sa Okaloosa County Sheriff's Office, ug sa uban pa alang sa pamilya ni Fortson.

"Roger's life and his service will always matter. His family will keep fighting for him, and we will stand with them as they pursue their civil rights case in federal court and seek accountability for the tragic loss of life," matod ni Crump sa usa ka pahayag.

Sa usa ka interview sa WEAR television news nga gipasalida niadtong Biyernes, matod ni Rod Smith, defense attorney ni Duran, usa ka "tragedy" ang nahitabo apan dili kini krimen tungod kay gisunod lamang sa iyang kliyente ang iyang training human makakita og armadong tawo. Matod ni Smith, kinahanglan unta nga "simply opened the door" si Fortson nga walay gikupot nga armas.

Matod sa pamilya ni Fortson, sayop nga pultahan ang gituktok sa deputy samtang mitubag sa usa ka disturbance complaint. Nagpresentar ang mga prosecutor og ebidensiya atol sa trial nga ang complaint nga gitubag sa mga deputy wala maglambigit kang Fortson.

Si Fortson, usa ka senior airman, nagserbisyo sa 4th Special Operations Squadron sa Hurlburt Field. Human sa iyang kamatayon, gihatagan siya sa Air Force og Air and Space Commendation Medal alang sa meritorious service samtang naka-assign isip special missions aviator.

-Ato ni Bai