Landslide sa Mount Fuji mitabon sa 3 ka sakyanan

Miigo ang landslide sa usa sa mga nag-unang agianan sa mga mosaka sa Mount Fuji sa Japan niadtong Miyerkules, human sa kusog nga ulan nga nakaapekto sa daghang lugar sa sentro sa nasud, sumala sa local broadcaster nga TBS.

Natabonan sa yuta ug mga debris ang tulo ka sakyanan, apan walay gikatahong nasamdan o namatay.

Nahitabo ang landslide human sa kusog nga ulan sa kabukiran sa Shizuoka Prefecture gikan Martes sa gabii hangtod Miyerkules sa buntag, sumala sa Japan Meteorological Agency.

Gisirhan usab tungod sa kusog nga ulan ang Fuji Subaru Line, usa sa mga nag-unang dalan paingon sa Mount Fuji.

Sa laing insidente, duha ka climber ang nakit-ang walay panimuot sa mga agianan sa Mount Fuji sayo sa Miyerkules, sumala sa Kyodo News nga mikutlo sa Shizuoka prefectural police. Wala gikonektar sa kapulisan ang maong insidente sa landslide ug nagpadala na og mountain rescue team ngadto sa lugar.

Laing landslide ang miigo sa Kawanehon sa Shizuoka Prefecture niadtong Martes sa gabii. Usa ka trabahante nga nakit-ang walay panimuot ang gikompirmang namatay, sumala sa lokal nga mga awtoridad.

Gibundakan usab sa kusog nga ulan ang duol nga Aichi ug Gifu prefectures niadtong Martes sa gabii, hinungdan sa pagbaha sa pipila ka lugar ug pagkasamad sa 41 ka tawo, sumala sa Kyodo.

Sa Nagoya, kapital sa Aichi Prefecture, natala ang rekord nga 104.5 millimeters nga ulan sulod lamang sa usa ka oras niadtong Martes sa gabii, sumala sa public broadcaster nga NHK.

Nabalda usab ang transportasyon tungod sa kusog nga ulan, hinungdan sa taas nga linya sa mga pasaherong na-stranded sa mga estasyon sa sentro sa Nagoya.

Gipaabot sa Japan Meteorological Agency nga magpadayon ang kusog nga ulan hangtod Miyerkules sa hapon sa mga lugar gikan sa northeastern hangtod western Japan. -Ato ni Bai