Lalis sa Pagmina ug Negosyo Gitan-aw nga Motibo sa Pagpusil nga Nakapatay og 27 sa South Africa

Gipangita pa sa South African police niadtong Domingo ang mga responsable sa duha ka managlahing pagpamusil nga nakapatay og 27 ka tawo sulod lamang sa pipila ka oras, nga nagpakita pag-usab sa problema sa nasud sa kapintasan nga naggamit og armas.

Gisuta pa sa mga opisyal ang motibo sa mga pagpamusil duol sa Johannesburg ug Cape Town, apan ang unang imbestigasyon nagpakita nga ang usa mahimong panagbangi sa teritoryo tali sa mga ilegal nga minero samtang ang usa mahimong tungod sa lalis sa negosyo.

Nagpabiling kaylap ang mapintas nga krimen sa South Africa bisan pa sa mga paningkamot sa gobyerno nga mapugngan ang usa sa labing taas nga gidaghanon sa pagpatay kada tawo sa kalibotan.

Sa Wedela township, mga 80 km (50 miles) gikan sa Johannesburg, 17 ka tawo ang namatay ug 15 ang nasamdan sa usa ka imnanan sa dihang nagpamusil ang mga suspek nga armado og AK-47 rifles mga alas 9:30 sa gabii (1930 GMT) niadtong Sabado, sumala sa kapulisan.

POSIBLENG BALOS ANG PAGPAMUSIL

Daghang residente ang nagduha-duha sa pagsulti bahin sa insidente, apan usa kanila ang miingon nga nagpuyo sa lugar ang mga ilegal nga minero, nga nailhan didto nga zama zamas gikan sa isiZulu nga ekspresyon alang sa “taking a chance”, diin gamhanang mga gang ang nagkontrol sa ilegal nga pagmina og bulawan.

Matod sa police commissioner sa probinsya nga si Tommy Mthombeni ngadto sa mga reporter sa lugar, usa sa gisusi sa imbestigasyon mao nga ang pagpamusil usa ka “turf war in terms of illegal mining”.

Adunay pagpamusil sa mao gihapong imnanan mga usa ka bulan ang milabay ug posibleng balos niini ang pagpamusil niadtong Sabado, dugang niya.

WALA PAY NADAKPAN

Miabot na sa township ang mga sundalo gikan sa national army ug mga police pathologist, diin makita usab ang duha ka nasunog nga sakyanan. Ang imnanan diin nahitabo ang pagpamusil adunay karatula nga nag-ingon og “No weapons allowed” ubos sa oras sa operasyon niini.

Sa lugar sa pagpamusil sa Lwandle, sa gawas sa Cape Town, nagtigom ang mga tawo luyo sa linya sa kapulisan apan dili sila gustong makigsulti sa mga journalist tungod sa kahadlok alang sa ilang kaluwasan.

Niining maong insidente, nagpamusil ang mga armadong lalaki sa usa ka lugar nga namaligya og sinugbang karne mga alas 2:00 sa kaadlawon niadtong Domingo, nga nakapatay og 10 ka tawo ug nakapasamad og 11 pa.

Makita sa video sa usa ka nakasaksi gikan sa lugar ang mga tawo nga nagsayaw ug nagkanta sa usa ka guot nga lugar sa gawas sa dihang kalit nga nadungog ang sunod-sunod nga pagpamusil ug mga singgit.

Matod sa usa ka opisyal sa kapulisan didto nga “a business jealousy might have been the issue,” tungod kay adunay mga taho nga ang mga tawo namalit og ilimnong makahubog sa mas barato nga mga lugar ug moadto sa maong lugar aron moinom.

Wala pay nadakpan ug nagpadayon ang mga detective sa pagpangita sa mga armadong lalaki, matod sa kapulisan sa mga pahayag.

“South Africa has a serious illegal firearms problem, and firearms are frequently used by organised criminal groups as well as in gang-related and other violent crimes,” matod sa eksperto sa krimen nga si Yusuf Abramjee.

HULGA SA DEMOKRASYA

“Every mass shooting should therefore trigger more than an investigation into the immediate perpetrators,” matod niya sa Reuters. “Authorities need to look at the wider networks behind the violence.”

Gilaom nga mahimong dakong isyu sa mga botante ang krimen sa municipal elections sa Nobyembre, diin nag-atubang ang African National Congress sa dugang nga pagkunhod sa suporta sa mga botante.

Miingon si President Cyril Ramaphosa sayo ning tuiga nga ang organisadong krimen nahimong labing dakong hulga sa demokrasya sa South Africa, ug gipadala niya ang kasundalohan aron motabang sa kapulisan sa pipila ka lugar.

Nakapatay og 11 ka tawo ang pagpamusil sa usa ka salo-salo sa balay duol sa Durban niadtong Martes sa gabii, samtang ang sunod-sunod nga pagkakaplag sa mga lawas sa mga babaye duol sa Johannesburg sukad Hulyo nakapukaw pag-usab sa kahadlok ug kasuko tungod sa taas nga gidaghanon sa pagpatay sa mga babaye. -Ato ni Bai