Lake Koroneia sa Greece Nagkagamay Tungod sa Pagbag-o sa Klima

Nahimong gipanalipdang kalamakan ang Lake Koroneia sa amihanang Greece sa wala pa miabot ang hulaw. Puy-anan kini sa liboan ka migratory ug langgam sa tubig, lakip ang mga flamingo, ug kanunay adtoon sa mga turista, lokal nga mangingisda, ug mag-uuma.

Mikunhod na karon ang Koroneia ngadto sa ubos sa ikanapulo sa orihinal nga gidak-on niini human sa usa ka dekada nga kulang nga ulan ug sobra nga irigasyon, sumala sa datos sa National Observatory of Athens. Kaniadto, kini ang ikalimang kinadak-ang lanaw sa Greece. Ang nahibiling tubig natigom na lamang sa pipila ka lubog nga pundok sa tubig, samtang ang nabutyag nga salog sa lanaw nahimong lapad nga lapokong kapatagan nga nangliki ug namuti tungod sa mga tuig nga kainit sa adlaw.

Nahimo nang simbolo ang maong lugar sa epekto sa pagbag-o sa klima ug hulaw sa amihanang Greece, diin nahimong dili na matag-an ang pag-ulan ug nagkadaghan ang mga mag-uuma nga desperadong magbomba og tubig gikan sa lanaw ngadto sa ilang mga pananom. Naapektuhan usab niini ang dakong bahin sa Europe niining ting-init, diin ang grabeng kainit ug kulang nga ulan nakapakunhod sa mga suba ug lanaw ngadto sa lebel nga wala makita sulod sa mga dekada, nga nakaapekto sa paghatod sa mga produkto ug nakapakunhod sa produksyon sa enerhiya.

“We knew the lake in its good days, with fishermen, with plenty of water, a wonderful park, and beautiful scenes with birds. Today, what we see is a disappointment,” matod ni Costas Hatzivoulgaridis, pangulo sa Agios Vassilios nga komunidad daplin sa lanaw.

KULANG NGA ULAN UG MAS INIT NGA PANAHON DAKOG EPEKTO

Matod sa mga siyentista, nagsugod pagkagamay ang tubig sa lanaw human sa ting-ulan sa 2015 hangtod 2016. Sukad niadto, ang mga tuig nga kulang ang ulan ug mas taas kaysa kasagarang temperatura nakapauga dili lamang sa tubig sa lanaw kondili usab sa mga tubod nga kaniadto nagsuplay niini.

Gipakita sa mga hulagway gikan sa satellite nga gipatik sa National Observatory of Athens nga mikunhod ang gilapdon sa lanaw ngadto sa 2.7 kilometro kwadrado gikan sa 34.4 kilometro kwadrado niadtong 2016.

“The main factor behind the lake’s falling level is certainly annual rainfall in its catchment, which has averaged about 400 millimeters (15.75 inches) over at least the last five years. That is about 150 millimeters less than in previous decades,” matod ni Dimitris Papadimos, pangulo sa pagdumala sa kahinguhaan sa tubig ug pagbag-o sa klima sa National Wetland Center, gikan sa iyang opisina sa Thessaloniki.

Dugang pa niya, tungod sa pagsaka sa kasagarang temperatura sa lugar sa miaging mga tuig, misaka usab og 100 hangtod 150 millimeters matag tuig ang gidaghanon sa tubig nga moalisngaw.

May bahin usab ang kalihokan sa tawo sa problema. Dugay nang naggamit ang mga mag-uuma sa tubig sa lanaw aron pun-an ang kakulang sa ulan alang sa ilang mga kahayopan ug pananom, matod sa mga residente ug opisyal.

Sa pagbisita sa usa ka reporter sa Reuters niaging bulan, nakita ang usa ka mag-uuma nga naggamit og dakong bomba aron mosuyop sa nahibiling tubig sa lanaw ug ibomba kini ngadto sa iyang kaumahan.

Matod sa mga awtoridad, naghimo na sila og mga lakang sukad sa paghukom sa korte sa European Union niadtong 2013 nga napakyas ang Greece sa pagpanalipod sa Koroneia batok sa sobra nga irigasyon, ilegal nga pagkalot og mga atabay, ug polusyon.

Gisultihan ni Petros Varelidis, secretary general for water resources sa Greek Environment Ministry, ang Reuters nga mas hugot na karon ang pagbantay aron makunhuran ang irigasyon. -Ato ni Bai